Ońtústik Qazaqstanda 729 Aýǵanstan azamaty zańsyz júrgen - Bas prokýratýra
ASTANA. Qarashanyń 12-si. QazAqparat /Aıdar Ospanalıev/ - Qazaqstanǵa shetten keletin mıgranttar sany tolastar emes. Ókinishtisi, olar elimizdiń aýmaǵyna tıisti zańdar men talaptardy buza otyryp, kirýge umtylýda.
Elimizge zańnan tys kelý áreketteriniń eń kóp taraǵan túri - arnaıy vızamen issaparǵa kelip, osynda uzaq ýaqytqa turaqtap qalý. Bul másele jóninde búgin jýrnalıstermen bolǵan aptalyq brıfıngte Bas prokýratýranyń resmı ókili Nurdáýlet Súıindikov málim etti, dep habarlaıdy QazAqparat.
Onyń sózine qaraǵanda, prokýratýra qyzmetkerleri atalǵan málimetterdi arnaıy tekserýler barysynda anyqtaǵan. «Sońǵy ýaqytta elimizde eńbek naryǵyn qorǵaý maqsatynda jáne respýblıkaǵa shet elderden jumys kúshin tartýǵa qatysty Úkimet tarapynan arnaıy kvota belgilendi. Degenmen ózge de birqatar shekteý sharalaryna qaramastan elimizge syrttan jumys kúshin tartý áreketteri jalǵasýda», dedi resmı ókil.
Onyń aıtýynsha, sheteldikterdiń elimizde turaqtap qalýyna ishki ister organy qyzmetkerleriniń Qazaqstanǵa vızamen kelgen sheteldik azamattardyń memlekette bolý merzimin zańǵa qarsy uzartyp berý áreketteri sebep bolyp otyr. «Mysaly, Ońtústik Qazaqstan oblysynda 729 Aýǵastan azamatyna zańǵa qaıshy iskerlik vıza berilgen. Mundaı áreketterden elimizdiń qorǵanys salasy da ada emes bolyp shyqty. Mańǵystaý oblysyndaǵy áskerı bólimsheniń aýmaǵyndaǵy jataqhana qurylysyn júrgizýge «Taneko» seriktestigi 78 Ózbekstan azamatyn tartqan. Radıoelektronıka jáne baılanys áskerı-ınjenerler ınstıtýtynda da Ózbekstannyń 9 azamaty jumys istep kelipti. Al Atyraý oblysynyń áskerı garnızonynyń qurylysynda 3 ózbekstandyq ishki ister organdarynda tirkelmeı-aq eńbek etip júrgen», dedi N.Súıindikov.
