Ońtústik Qazaqstanda 30 mamandyq boıynsha óńiraralyq chempıonat bastaldy
Oblystyq bilim basqarmasy uıymdastyrǵan óńiraralyq chempıonatqa Qyzylorda, Jambyl, Ońtústik Qazaqstan oblystarynyń kolledjderinen 123 stýdent qatysýda. Sharanyń ashylý saltanatyna oblys ákimi Janseıit Túımebaev, QR Parlamenti Májilisiniń depýtaty Ábdimanap Bekturǵanov bastaǵan Májilis depýtattary, «Nur Otan» partııasynyń Ortalyq apparaty men QR Bilim jáne ǵylym mınıstrliginiń ókilderi jáne Ózbekstan Respýblıkasy men Jambyl, Qyzylorda oblystarynan delegattar, oblystyq máslıhattyń depýtattary, barlyǵy 500-den astam adam qatysty. Bilim saıysynyń qatysýshylaryna sáttilik tilegen oblys ákimi búginde elimizde tehnıkalyq-kásiptik mamandardy daıarlaýǵa úlken mán berilip otyrǵanyn atap ótti.
«Búgingi tańda elimizde ındýstrıaldy-ınnovatsııalyq damý baǵdarlamasy iske asyrylýda. Ony júzege asyrý úshin jańa úlgidegi óndiristik jeliler ashý jáne joǵary bilikti sheber mamandardy qalyptastyrý talaby qoıyldy. Sondyqtan da Memleket basshysy Nursultan Ábishuly Nazarbaev elimizde bilim berýdi damytý, sonyń ishinde tehnıkalyq-kásiptik mamandardy daıarlaýǵa úlken mán berip otyr. «Qazaqstan-2050» strategııasynyń negizgi basym mindeti eldiń ındýstrııalyq-ınnovatsııalyq damý suranystaryn eskere otyryp, básekege qabiletti kadrlardy daıarlaý bolyp tabylady. Oblystaǵy tehnıkalyq jáne kásiptik bilim salasynda Elbasymyzdyń «Bes áleýmettik bastamasy» aıasynda aýqymdy sharalar qabyldanyp jáne 2017 jylǵy qyrkúıekten bastap «Barshaǵa tegin kásiptik-tehnıkalyq bilim» jobasy júzege asyrylýda»,-dedi aımaq basshysy.
Tórt kún boıyna jalǵasatyn bilim jarysynda qatysýshylar ınjenerlik, santehnıka jáne jylytý, veb-dızaın, elektrmontaj, kirpish qalaý, qurǵaq qurylys jáne sylaq jumystary, keskindeme jáne sándik jumystar, mobıldi robototehnıka syndy 30 mamandyq boıynsha baqtaryn synamaq. Sharada sondaı-aq stýdentter jasaǵan aýylsharýashylyq tehnıkalary men shyǵarmashylyq-ınnovatsııalyq jobalyq kórmeler uıymdastyrylýda.
Tehnıkalyq jáne kásiptik bilim mekemeleri stýdentteriniń arasynda ótkiziletin «WORLDSKILLS KAZAKHSTAN - 2018» óńiraralyq chempıonatynyń jeńimpazdaryna oblystyq bilim basqarmasynyń І, ІІ jáne ІІІ dárejeli dıplomdary men medaldar tapsyrylatyn bolady. Jarystyń jeńimpazdary 2018 jyly maýsym aıynda Astana qalasynda ótetin Ulttyq chempıonatqa qatysady.
Eske salsaq, byltyrǵy jyly ótken «WorldSkills Kazahstan -2017» Ulttyq chempıonatynda oblysymyzdan 9 baǵyt boıynsha qatysqan stýdentterdiń 1-i altyn medal, 5-i kúmis medal ıelense, jeńil ónerkásip jáne servıs kolledjiniń stýdenti Ulybrıtanııa, Japonııa, Qytaı, TMD elderi qatysqan «WorldSkills Rossia - 2017» halyqaralyq chempıonatynda ІІІ oryndy jeńip alǵan bolatyn.
Aıta keteıik, Ońtústik Qazaqstan oblysynda 2017-2018 oqý jylynda 94 (43 memlekettik, 51 jekemenshik) tehnıkalyq jáne kásiptik bilim berý uıymdarynda 74176 stýdent bilim alýda. Onyń ishinde 34592 stýdent memlekettik tapsyryspen oqıdy.
