Ońtústik Qazaqstanda 30-dan astam sáýlettik joba ázirlendi
ASTANA. QazAqparat - Ońtústik Qazaqstan oblysynda 2017 jyly 30-dan astam sáýlettik jobalar ázirlendi. Olardyń qatarynda óńirdegi týrızmdi damytýǵa baǵyttalǵan eskızder, sondaı-aq Shymkent qalasyndaǵy jańa áýejaı jáne temirjol vokzaly men shahardaǵy kópqabatty túrǵyn úı keshenderiniń jobalary bar. Búgin bul týraly OQO óńirlik kommýnıkatsııalar qyzmetinde ótken brıfıngte oblystyq sáýlet jáne qala qurylysy basqarmasy basshysynyń orynbasary Baqtybaı Dúısebekov málim etti.
Onyń aıtýynsha, sáýlettik jobalardyń arasynda Túrkistan qalasyndaǵy tarıhı-mádenı týrızmdi damytý tujyrymdamasy, «Qasqasý» demalys aımaǵy, Shymkent qalasyndaǵy shatqaldardy kógaldandyrý men jaıaý júrginshilerge arnalǵan «Arbat» tıpindegi joldar, «Eski qala» aýmaǵy bar.
«Rýhanı jańǵyrý» baǵdarlamasyna sáıkes oblys aýmaǵyndaǵy 500 eskertkish anyqtalyp, onyń ishinde 100 nysannyń tizimi oblystyq mádenıet basqarmasymen birlesip jasaldy. Olardyń qatarynda aýdan ortalyqtaryndaǵy salynatyn «Dostyq úıi» jobasy, «Qazyǵurt» tarıhı-etnografııalyq kesheni, «Karaýyl tóbe», «Qoshqar ata» ózeniniń boıyn jáne «Ordabasy» memorıaldyq tarıhı-mádenı keshenin abattandyrý men kógaldandyrý, «Kóne Túrkistan» qalashyǵyn qalpyna keltirý, «Uly dala» saıabaǵynyń nobaıy syndy jobalar ázirlendi», - dedi Baqtybaı Elikuly.
Sonymen qatar, aýdan, qala ákimdikteriniń tarapynan memlekettik qurylys normalary saqtalmaı salynǵan qurylys nysandar boıynsha qaraý jáne sharalar kórýge tıisti mekemelerge hattar joldanǵan. Nátıjesinde 138 qurylys nysanyna tıisti sharalar kórilip, 272 qurylys nysany boıynsha áli de jumystar atqarylýda.
Basqarmanyń málimdeýinshe aýdandyq, qalalyq sáýlet jáne qala qurylysy bólimderine ótken jyly «Qurylys jáne rekonstrýktsııa jobalaryna bastapqy materıaldardy berý týraly» 4004 ótinish túsip, onyń 3418-i qanaǵattandyrylǵan.
Sondaı-aq, oblystyq sáýlet jáne qala qurylysy basqarmasy tarapynan ótken jyly barlyq josparlanǵan 4187 qurylys nysany boıynsha júrgiziletin qarjy kózderi zerttelip, nátıjesinde 3395 nysan jeke qarjy esebinen, 782 nysan memlekettik qarjy esebinen salynyp otyr.
