Ońtústik Qazaqstanda 200 myńǵa jýyq bala sherýge qatysty
ASTANA. QazAqparat - Ońtústik Qazaqstan oblysynda 1 maýsym - Halyqaralyq balalardy qorǵaý kúnine oraı bir mezette jas mýzykanttardyń ІІ «Shabyt» sherýi ótti. Elimizde dástúrli túrde ótkiziletin bıylǵy sherýde oblys boıynsha 200 myńǵa jýyq oqýshy qatysýda.
Shymkent qalasyndaǵy Q.Muńaıtpasov atyndaǵy ortalyq stadıonda ótken sharaǵa oblys ákimi Janseıit Túımebaev qatysyp, balalardy merekemen quttyqtady.
«Elbasymyz Nursultan Nazarbaevtyń «Rýhanı jańǵyrý» baǵdarlamasy aıasynda jastarǵa qoldaý kórsetý jáne múmkindikter álemine jol bastaý maqsatynda ıgi ister atqarylýda. Sonyń biri jáne biregeıi búgingi «Shabyt» sherýi. Sherý - bul bizdiń elimizdiń barlyq bilim berý uıymdaryn biriktiretin jáne ustazdar men olardyń shákirtteriniń jetistikterin barsha halyqqa nasıhattaý arqyly mekemelerdegi ujymǵa shabyt syılaıtyn keń kólemdi respýblıkalyq aktsııa. Sherýdiń basty maqsaty estetıkalyq jáne patrıottyq tárbıe faktory retinde balalardyń saltanatty kóshe-festıvaldi Sherýin qoldaý jáne damytý bolyp tabylady», - dedi J.Túımebaev.
Jastardyń mýzykalyq orkestrleri men ansamblderiniń sherýine qala boıynsha 20 myń oqýshy qatysty. Sonymen qatar 200 mektep oqýshy «Men qazaqpyn» ánine fleshmob uıymdastyrdy. Mýzykalyq-teatrlandyrylǵan sherý balalarǵa merekelik kóńil-kúı syılap, balalyq shaq meıramynyń aıryqsha áserin este qaldyrdy.
Aıta keteıik, 2016-2017 jyldar aralyǵynda 370-ke jýyq ónerpaz balalar halyqaralyq deńgeıde ótken baıqaýlarǵa qatysyp, 174 júldeli oryndarǵa ıe boldy. Sonymen qatar, Qazaqstan Respýblıkasynyń mektep jáne kolledj oqýshylary arasynda 52 sport túrinen ІH jazǵy spartakıada ótýde. Oǵan 28 OQO qurama komanda qatysyp, onyń 15-i birinshi oryndy, al 5-ýi ekinshi oryndy ıelense, úshinshi oryndy 5 bala ıemdendi.
