Ońtústik Qazaqstan jigitteriniń sultany anyqtaldy
ShYMKENT. QazAqparat - Ońtústik Qazaqstan oblysynda «Jigit sultany-2017» baıqaýy ótti. Oblystyq Ádet-ǵuryp jáne salt-dástúr ortalyǵy uıymdastyrǵan sharaǵa aýdan-qalalardan 14 úmitker qatysty, dep habarlaıdy QazAqparat tilshisi.
Elbasy N. Nazarbaevtyń «Bolashaqqa baǵdar: rýhanı jańǵyrý» maqalasy aıasynda uıymdastyrylǵan baıqaýda syry men symbaty, boıy men oıy kelisken, segiz qyrly bir syrly, saıdyń tasyndaı jigitter baǵyn synady. Úmitkerler «shıratý» kezeńinde úı sharýasyna eptilikterin synap, jan-jaqtylyǵyn baıqatty.
Keıin Shámshi Qaldaıaqov atyndaǵy fılarmonııada saıystyń ekinshi kezeńine qatysty. Onda saıysqa bel býyp, talaptyń tulparyna minip kelgen jigitter 3 bólim boıynsha baqtaryn synady.
Qazylar alqasy quramynda aqyn-sazger Ábdiqalyq Ábdiraımov, «Túrkistan» saraıynyń dırektor orynbasary, Kókshetaý qalasynda ótken respýblıkalyq «Jigit sultany-1995» baıqaýynyń bas júldegeri Qurmash Jylqybaı men qoldanbaly óner sheberi Muhtar Atahan qazylyq etti.
Baıqaý qorytyndysymen jeńimpazdar anyqtalyp, nátıjesinde Arys aýdanynan kelgen úmitker 3-shi oryndy ıelense, otyrarlyq er azamat 2-shi oryndy jeńip aldy. Al Saryaǵash aýdanynan kelgen qatysýshy 1-shi orynǵa laıyq dep tanylsa, bas júlde Ordabasy aýdanynan kelgen seri jigitke buıyrdy. Baıqaýdyń barlyq qatysýshylary men júldeli oryn ıegerlerine marapattaýlar men qarjylaı syılyqtar tapsyryldy.
