Ońtústik Qazaqstan oblysyndaǵy maqtaly aýdanda 87 óndiristik koopeartıv quryldy
ShYMKENT. QazAqparat - Ońtústik Qazaqstan oblysyndaǵy Maqtaral aýdanynda agroónerkásip keshenin damytýdyń jańa memlekettik baǵdarlamasy aıasynda 87 aýyl sharýashylyǵy óndiristik koopeartıvi quryldy. Jańadan ashylǵan óndiristik kooperatıvterge tehnıka alýǵa, aǵyn sýmen qamtamasyz etýge, mıneraldy tyńaıtqyshtar tasymaldaýǵa, entomofaktar óndirý úshin memleket tarapynan túrli qoldaýlar kórsetilýde, dep habarlaıdy QazAqparat HAA tilshisi
Memleket basshysy halyqqa arnaǵan Joldaýynda aımaqtardaǵy jeke úı sharýashylyqtary men shaǵyn fermerlerdi kooperatıvterge tartyp, shaǵyn sharýa qojalyqtaryn irilendirý boıynsha mindetteme qoıǵan bolatyn. Jańa bastamany ózge aýdannyń sharýalaryna tanystyrý maqsatynda Myrzashól óńirinde mamandandyrylǵan kezekti kóshpeli semınar ótti. Onda aýylsharýashylyǵy kooperatıvterin qurýdy uıymdastyrý, kooperatıvterdi memlekettik qoldaý quraldary men onyń tıimdi joldary talqylandy. Maqta men qarqyndy baý sharýashylyǵyn damytý jaıy sóz boldy.
Semınarǵa jetekshilik etken oblystyq aýylsharýashylyǵy basqarmasy basshysynyń orynbasary Asqar Qanybekov óńirdegi maqta egisiniń 80 paıyzy Maqtaral aýdanyna tıesili ekenin aıtyp, ónimniń túsimdiligin arttyrýǵa kúsh salý kerektigine toqtaldy. Atalǵan aýdannyń sharýalary maqta shıtiniń tuqymyn áli de kórshiles elderden alyp keletinin aıtyp, memleket tuqym sharýashylyǵyn ózimizde damytýǵa erekshe kóńil bólip, arnaıy osy baǵytqa sýbsıdııa bólip otyrǵandyǵyn atap ótti. Semınarǵa jınalǵandar maqta men jemis-jıdek ósirý boıynsha sheberlikterin shyńdap, osy saladaǵy ozyq tehnologııalarmen tanysty.
Aıta keteıik, ótken jyly Maqtaral aýdanynda 83 myń gektardan astam jerge maqta daqyly egilip, ortasha ónimdilik 218,5 myń tonnany quraǵan. Al aýdandaǵy egistikterdi ártaraptandyrý jumystarynyń nátıjesinde bıylǵy jyly boljamdyq málimetterge sáıkes aýdan sharýalary 80 myń gektar alqapqa maqta daqylyn egýdi josparlap otyr.
