Ońtústik Qazaqstan oblysynda joǵalyp ketken ormanshylar tabyldy
ShYMKENT. QazAqparat - Ońtústik Qazaqstan oblysyndaǵy Aqsý-Jabaǵyly qoryǵynda iz-túsiz joǵalyp qalǵan qoryqshylar tabyldy, - dep habarlaıdy QazAqparat HAA tilshisi.
2 aqpan kúni Aqsý-Jabaǵyly qoryǵynyń eki ormanshysy is-josparyna sáıkes taý bókterine shyǵyp ketedi. Alaıda aýa-raıy borandatyp, jol kórinbeı qalǵan. Sóıtip belgilengen jerge jete almaı, adasyp qalypty.
Qos qoryqshynyń habarsyz ketkenin aıtyp, ormanshylar óńirdiń tótenshe jaǵdaılar qyzmetine qarasty qutqarýshylardy kómekke shaqyrǵan.
«4 aqpan kúni saǵat 04.10 shamasynda Aqsý-Jabaǵyly qoryǵynyń qoryqshylary joǵalyp, belgilengen orynǵa jetpegeni týraly habar kelip tústi. OQO TJD qarasty «Jedel-qutqarý jasaǵynyń» tórt qutqarýshysy men bir tehnıka oqıǵa ornyna baryp, izdestirý jumystaryn júrgizdi. Іzdestirý sharalaryna Aqsý-Jabaǵyly orman sharýashylyǵynyń 3 qyzmetkeri de jumyldyryldy», - dedi qutqarý jasaǵynyń jetekshisi P. Vıshenın.
Top músheleri qoryqshylardyń izimen júrip, Jambyl oblysy, Jýaly aýdany aýmaǵyndaǵy Amangeldi eldi mekenine deıin jetken. Joǵalǵan ormanshylardyń birinde uıaly telefony bar bolýyna baılanysty GPS navıgatsııany paıdalanǵan. Saǵat 10.40- tar shamasynda qos qoryqshy tabyldy. Olarǵa alǵashqy medıtsınalyq kómek kórsetilip, úılerine qaıtaryldy.
Qoryqshylardy izdeý barysynda qutqarýshylar sondaı-aq boranda turyp qalǵan jeńil kólikterdiń júrgizýshilerine de kómek kórsetken. Qar qursaýynda qalǵandardyń kólikterin jolǵa shyǵaryp, qutqarý sharalaryn júrgizdi. 
