Ońtústik Qazaqstan oblysynda kongo-qyrym bezgegin juqtyrǵan 22 adamnyń 8-i qaıtys boldy
ASTANA. Qazannyń 29-y. QazAqparat /Aıdar Ospanalıev/ - Bıyl Ońtústik Qazaqstan oblysynda 22 adam kongo-qyrym bezgegin juqtyrsa, olardyń 8-i aýrý saldarynan kóz jumdy.
Bul málimetti búgin jýrnalıstermen bolǵan aptalyq brıfıngte Bas prokýratýranyń resmı ókili Nurdáýlet Súıindikov keltirdi, dep habarlaıdy QazAqparat.
Onyń aıtýynsha, bıylǵy jyly elimizdiń ońtústik aımaqtarynda kongo-qyrym bezgegi tarap, respýblıkanyń taǵy bir óńirlerinde sibir kúıdirgisi sııaqty dertter paıda bolǵan. Osyǵan baılanysty Bas prokýratýra ókilderi atalmysh indetterdiń taraýynyń aldyn alý men onyń oshaǵyn joıý jáne naýqastanǵan azamattarǵa tıisti dárigerlik kómekterdiń talapqa saı kórsetilýine baılanysty arnaıy tekserý júrgizgen. «Tekserý jumystarynyń nátıjeleri atalmysh aýrýlardyń saýyqtyrý sharalarynyń nasharlyǵynan taraǵandyǵyn kórsetken. Mysaly, Ońtústik Qazaqstanda kenege qarsy júrgiziletin saýyqtyrý sharalary jetkilikti mólsherde qarjylandyrylmaǵandyqtan talapqa saı júrgizilmegen. Nátıjesinde aımaqta kongo-qyrym bezgegi taraı bastady. Atalmysh indetpen 22 adam naýqastanyp, onyń 8-i qaıtys bolǵannan keıin ǵana respýblıkalyq bıýdjetten 196 mıllıon teńge bólinipti. Soǵan qaramastan respýblıkanyń jergilikti jerlerinde saýyqtyrý sharalary áli de bolsa talapqa saı júrgizilmeı otyr», dedi resmı ókil.
Onyń mysalǵa keltirgen málimetterine qaraǵanda, Ońtústik Qazaqstan oblysynyń Saıram aýdanyndaǵy kenege qarsy saýyqtyrý sharalaryn júrgizý maqsatynda tartylǵan «Pıramıda ósimdik qorǵaý - 777» jaýapkershiligi shekteýi seriktestigi turǵyndarǵa óz úıleriniń aınalasyn zararsyzdandyryp shyǵý maqsatynda arnaıy dár-dármekterdi taratýmen ǵana shektelgen. «Al Aqmola oblysynyń densaýlyq saqtaý salasynyń ókilderi arnaıy jyljymaly zerthana men zararsyzdandyrýǵa arnalǵan qondyrǵysy bar 2 kólik satyp alýǵa bergen qarjyny «Toıota Kamrı» avtokólikterin satyp alýǵa jumsaǵan. Sondaı-aq respýblıkanyń keıbir aımaqtarynda juqpaly aýrýlardy der kezinde esepke qoımaý, dezınfektsııalaý merzimin saqtamaý, medıtsınalyq qoqsyqtardyń ýaqytynda joıylmaýy, medıtsıalyq mekemelerdiń sanıtarlyq talaptarǵa saı emestigi sııaqty kóptegen kemshilikter anyqtaldy», dedi N.Súıindikov.
