Ońtústik Qazaqstan oblysynda qoǵamdyq kólikterdiń júrgizýshileri jol erejelerin saqtamaıdy
ShYMKENT. QazAqparat - Ońtústik Qazaqstan oblystyq Jergilikti polıtsııa qyzmetiniń ókilderi «Avtobýs» jedel-aldyn alý sharasyn ótkizip, bir táýlikte qoǵamdyq kólik júrgizýshilermen oryn alǵan 158 ákimshilik quqyqbuzýshylyqty tirkedi, dep habarlaıdy QazAqparat HAA tilshisi.
Qoǵamdyq kólikterdi tekserý barysynda júrgizýshilerdiń kólik quraldaryn basqarý kezinde uıaly telefon nemese basqa da baılanys quraldaryn paıdalaný, jyldamdyqty arttyrý sııaqty jol erejelerin saqtamaǵany anyqtaldy. Sondaı-aq jaıaý júrginshilerdi ótkizbeı, qujattaryn talapqa saı rásimdemegen bolyp shyqty. Bázbiriniń tehnıkalyq baıqaý merzimi ótip ketse, ózgelerinde zańsyz qaıta jabdyqtaý, jolaýshylardy jáne júkti tasymaldaýǵa ruqsat berý kýáligi bolmaý sııaqty kemshilikter kezdesken. Odan bólek, jolaýshylar tizimi men azamattyq-quqyqtyq jaýapkershiligi jónindegi mindetti saqtandyrý qaǵazdary bolmaı shyqty. Eńbek jáne demalys tártibin saqtamaýdyń 9 deregi anyqtaldy.
Reıd barysynda polıtseıler jol júrisi erejelerin óreskel buzǵan 3 avtokólikti aqyly aıypturaqqa jetkizdi.
Aıta keteıik, «Avtobýs» jedel is-sharasyna jalpy 800-den astam polıtsııa qyzmetkeri men basqa da memlekettik organdar men qoǵamdyq uıymdardyń ókilderi jumyldyryldy. Onyń ishinde kólik ınspektsııasy, memlekettik kirister departamenti ókilderi de bar. Tártip saqshylary munymen shektelmeı, bul sharany taǵy eki kún boıy júrgizýdi josparlap otyr.
Aınur Aqbaeva
