Ońtústik Qazaqstan oblysynda ınvestıtsııa kólemi 31,5% ósti
ASTANA. QazAqparat - Ońtústik Qazaqstan oblysynda ınvestıtsııa kólemi 31,5 paıyzǵa artty. Bul týraly Ońtústik Qazaqstan oblysy ákiminiń orynbasary Ulasbek Sádibekov Ortalyq kommýnıkatsııalar qyzmetinde ótken baspasóz máslıhatyna habarlady.
«2017 jyldyń alǵashqy 7 aıynda oblysta mańyzdy jobalardy iske asyrý boıynsha atqarylǵan jumystardyń nátıjesinde oblysqa 229,9 mlrd teńge ınvestıtsııa tartyldy, bul 2016 jylǵy kórsetkishpen (166,4 mlrd teńge) salystyrǵanda 31,5 paıyzǵa kóbirek. Onyń ishinde syrtqy ınvestıtsııalar 42,3 mlrd teńgeni qurap, óńirdi respýblıkalyq deńgeıde birinshi orynǵa shyǵardy. Respýblıka boıynsha oblystyń jalpy kórsetkishi 14,1%-dan 16,9%-ǵa deıin ósti. Ótken jyldyń sáıkes kezeńimen salystyrǵanda óńirlik ónim kólemi 2,7%-ǵa artyp, 187,8 mlrd teńgeni qurady», - dedi U.Sádibekov.
Sonymen birge, OQO ákiminiń orynbasary óńirdegi bıylǵy egin alqabynyń 20,7 myń gektarǵa artyp, 809,5 myń gektardy quraǵanyn atap ótti. Sondaı-aq, qosymsha 297 kooperatıv quryldy, olardyń sany ótken jylmen salystyrǵanda eki esege kóbeıip, 593 danany quraǵan.
U.Sádibekovtyń aıtýynsha, oblysta bıýdjetke túsken salmaqty azaıtý maqsatynda memlekettik-jekeshelik seriktestik mehanızmi qoldanylýda. Sońǵy 7 aıda jalpy somasy 9,3 mlrd teńge bolatyn 13 joba boıynsha kelisimder bekitildi. Onyń 8-i bilim berý júıesinde bolsa, ekeýi - densaýlyq saqtaý salasynda, úsheýi - sport salasynda. Sondaı-aq, «Onkologııalyq ortalyq qurylysy», «Qaýipsiz qala», «Kóshelerdi jaryqtandyrý» syndy iri jobalardy júzege asyrý boıynsha jumystar júrip jatyr.
