Ońtústik Qazaqstan oblysynda eki jumysshy tokqa túsip, ajal qushty
ShYMKENT. QazAqparat - Ońtústik Qazaqstan oblysynda eki jumysshy tokqa túsip, mert boldy, - dep habarlaıdy QazAqparat HAA tilshisi oblystyq ІІD baspasóz qyzmetine silteme jasap.
Qaıǵyly oqıǵa Qazyǵurt aýdanyna qarasty Sharaphana aýylynyń tusynda bolǵan. Osy eldi meken tusynda kósheni jaryqtandyrýmen aınalysqan jumysshylar saqtyq sharalaryn saqtamaǵanǵa uqsaıdy. Shymkent-Termez tas jolynyń boıyndaǵy joǵary kerneýli elektr baǵanasyna shyqqan kezde toq uryp, segiz metr bıiktikten qulap qalady. Eki jumysshy da sol jerde jantásilim etken. Qazir osy derek boıynsha qylmystyq is qozǵalyp, quzyrly mekememen anyqtaý jumystary júrgizilýde.
«Aldyn ala málimetterge qaraǵanda qaza bolǵan jumysshylar «Otyrar joldary» JShS-de elektrık bolyp jumys istegen. Baǵanaǵa shyqqan kezde joǵary kerneýli symǵa tıip ketken bolýy múmkin ári bıiktikten qulap qalǵan. Qazir jumysshylardyń neden qaıtys bolǵany anyqtalýda. Qaıǵyly jaǵdaıǵa baılanysty bizdiń ınspektsııa tarapynan arnaıy komıssııa quryp, mán-jaıdy jan-jaqty anyqtaıtyn bolamyz»,-dedi Oblystyq eńbek ınspektsııasy basqarmasy basshysynyń orynbasary Begman Nurmahanov.
Aıta keteıik, ınspektsııa mamandary ótken jyly óńirde 8 adam tokqa túsken deregi tirkelgenin aıtady.
