Ońtústik Qazaqstan oblysynda 710,6 mlrd teńgeniń ónerkásip ónimi óndirildi
ShYMKENT. QazAqparat - Bıyl Ońtústik Qazaqstan oblysynyń óndiris oryndarynda 710,6 mıllıard teńgeniń ónimi óndirildi. Bul ótken jyldyń osy kezeńimen salystyrǵanda 113,8 mıllıard teńgege artyq. Osylaısha, áleýeti artqan óńir elimizde 4-oryndy ıelendi. Bul týraly oblys ákimdiginiń baspasóz qyzmetine silteme jasap, QazAqparat tilshisi habarlaıdy.
Atap aıtqanda, ken óndirý 208,3 mıllıard teńge, óńdeý ónerkásibi 437,8 mıllıard, elektrmen qamtý, gaz, bý berý jáne aýa baptaý salasynda 52,7 mıllıard, al sýmen jabdyqtaý boıynsha 11,8 mıllıard teńgeniń ónimi óndirilgen. Sonymen qatar, óńirde Indýstrıalandyrý kartasy aıasynda jalpy quny 227,9 mıllıard teńgeniń 150 jobasy iske asqan. Nátıjesinde 13 myńnan astam jańa jumys orny ashylǵan.
Sondaı-aq, 2010-2016 jyldary Indýstrıalandyrý kartasy aıasynda iske qosylǵan jobalarmen 280 mıllıard teńgeden astam ónim shyǵarylǵan. Óńirdiń ınvestıtsııalyq tartymdylyǵyn arttyrý, shaǵyn jáne orta bıznestiń damýyna qolaıly jaǵdaı jasaý maqsatynda oblystyń barlyq aýdan, qalalarynda 11 ındýstrıaldy aımaq qurylýda. 2010 jyly elimizde eń alǵashqy bolyp qurylǵan «Ońtústik» ındýstrıaldy aımaǵynda jumys istep turǵan túrli kásiporyndar memlekettik tabys salyǵyna 5,3 mıllıard qarjy túsirgen. Osylaısha, «Ońtústik» ındýstrııalyq aımaq kásiporyndarynyń salyq túsimderiniń esebinen 77,9% bıýdjet qarajatynyń orny toltyrylǵan.
Almas Sultan
