Ońtústik Qazaqstan oblysynda 5 adam qurban bolǵan paromdy paıdalanýǵa buǵan deıin tyıym salynǵan

Bul týraly búgin Astanada QR Kólik jáne kommýnıkatsııa mınıstrliginiń kóliktik baqylaý komıtetiniń bas sarapshysy Arlan Zakarıanov málim etti, dep habarlaıdy QazAqparat.

Aıta keteıik, sáýirdiń 3-inde OQO-nyń Baltakól aýylyndaǵy Syrdarııa ózeniniń ekinshi betine ótip bara jatqan paromnan bir avtokólik sýǵa qulap, batyp ketken. Onyń ishinde otyrǵan 5 adam qaza tapty.

«Bul sý kóligi tyıym salynǵan jaǵdaıda boldy. Ońtústik Qazaqstan oblysy boıynsha kóliktik baqylaý aımaqtyq ınspektsııasynyń atalǵan paromdy paıdalanýǵa tyıym salý jóninde tıisti uıǵarymy jasalǵan. Atalǵan oqıǵa boıynsha qazirgi kezde tekseris júrgizilýde. Aldyn ala aıtatyn bolsaq, qaýipsizdik erejesi turǵysynda bul sý kóligi ıesiniń tarapynan talaptardy saqtamaý faktisi oryn alǵan», dedi A. Zakarıanov.

Onyń aıtýynsha, bul paromnyń ıesi OQO Otyrar aýdanynyń qaraýyndaǵy «Otyrar qyzmet» memlekettik kommýnaldyq sharýashylyǵy. Olar bul sý kóligin paıdalanbaýy tıis edi.

Paromnyń tehnıkalyq jaǵynan daıyndyǵy tıisti deńgeıde emes ekenin jetkizgen ol, atap aıtqanda bul sý kóligin 2008 jyldan beri paıdalanýǵa tyıym salynǵanyn aıtyp ótti.

Bas sarapshynyń sózine qaraǵanda, atalmysh parom osy ýaqytqa deıin paıdalanylmaǵan. Alaıda bıylǵy jylǵy naýryzdyń 4-inen bastap qaıta iske qosylǵan.