Ońtústik Qazaqstan oblysy ótken jyly 7 myńnan astam maldy eksporttady
ASTANA. QazAqparat - Ońtústik Qazaqstan oblysynda óndiriletin aýyl sharýashylyǵy ónimderi men et eksportynyń kólemi artyp keledi.
Jalpy ótken jyldyń 11 aıy boıynsha oblystan 195 mln. AQSh dollary bolatyn aýylsharýashylyq jáne azyq-túlik ónimderi eksporttalsa, onyń kólemi 1,3 mln. tonnany qurady. Bul týraly OQO Aımaqtyq kommýnıkatsııalar qyzmetinde ótken brıfıngte oblystyq aýyl sharýashylyǵy basqarmasynyń basshysy Serik Turbekov málim etti.
Onyń aıtýynsha, 2016 jyly oblystan 6 700 bas usaq mal, 400 bas iri qara jáne 200-ge tarta jylqy eti eksporttaldy. Onyń ishinde «Qaıyp Ata» JShS Birikken Arab Ámirliginiń MYCo Trading FZE kompanııasymen birlese otyryp 2000 bas qoıdy Fýdjeıra qalasyna jetkizgen. Irandyq GO HARD TALAYI PASARGAD kompanııasymen jylyna 3 myń tonna qoı etin eksporttaý boıynsha kelisimshartqa qol qoıylǵan. Sonymen qatar, qoı men iri qara mal etin Irak, Saýd Arabııasy, Qytaı elderine eksporttaý boıynsha kelissózder júrgizilýde.
«Sonymen qatar, óńirde 2016 jyly jylyna 6 myń tonna et óńdeıtin «Qaıyp ata» JShS-niń et kombınaty iske qosyldy. Atalǵan kombınat halyqaralyq standarttarǵa saı halal et óńdeıdi. Jáne qýattylyǵy 3000 bas iri qara maldy bordaqylaýǵa arnalǵan 2 joba júzege asyryldy. Osylaısha biz oblys turǵyndaryn etpen 157 paıyzǵa qamtyp otyrmyz», - dedi Serik Turbekov.
Ońtústik Qazaqstanda usaq mal men iri qara mal etin óndirýden bólek, qus etin óndirý jumystary da damytylýda. Osyndaı sátti júzege asqan jobalardyń biri 2010 jyly qurylǵan «Ordabasy qus» JShS. Bul joba kúrketaýyqty jumyrtqadan ósirip, ony semirtip, tereń óńdep, daıyn ónim shyǵaratyn birneshe jeliden turady. Qýattylyǵy boıynsha jylyna 10 myń tonna daıyn ónim shyǵarady. Atalǵan kásiporyn Ortalyq Azııadaǵy úndik etin aýqymdy kólemde óndirip, eksporttaıtyn jalǵyz qus fabrıkasy bolyp tabylady. Onyń ónimderiniń 40 paıyzy Eýrazııalyq odaq elderine eksporttalýda. Qazirgi tańda kásiporyn qýattylyǵyn jylyna 20 myń tonna ónimge arttyryp, Ortalyq Azııa, Eýropa elderine, Aýǵanstandaǵy NATO kontıngentine eksporttaýdy kózdep otyr.
