Ońtústik Qazaqstan oblysy ımporttyq ónimderden bas tarta bastady
«Oblysqa ımporttalatyn keıbir ónimder óz óńirimizde shyǵaryla bastady. Al, tsellıýloza, tsement, motor maılary, transformatorlar, alıýmınııdi jáne PVH profılderin, et, maı, kilem, mata, dári-dármek buıymdaryn eksporttaý qolǵa alyndy. Sonymen qatar, Shymkent munaı óńdeý zaýytyn jańǵyrtý jumystary júrgizilýde. Munaı óńdeý ónimdiligi jylyna 6 mln tonnaǵa deıin jetkizilip, joǵary oktandy benzınniń úlesi 100 paıyzdy quraıtyn bolady», - dedi ákim Ortalyq kommýnıkatsııalar qyzmetindegi baspasóz máslıhaty barysynda.
Osy oraıda ol basymdy baǵyt - ınvestorlarmen birigip, iri jobalardy iske asyrýǵa negizdelgenin atap ótti.
«Mysaly, Qazyǵurt aýdanynda 603 mln teńge turatyn qurǵaq sút jáne sary maı shyǵarý zaýytyn salyp, iske qosý jumystary júrgizilip jatyr. Sonymen qatar, «Ordabasy-Qus» JShS-men kúrketaýyq etin óndirý óndirisi qýattylyǵyn jylyna 25 myń tonnaǵa ulǵaıtý kózdelip otyr. Oblysta alǵashqy ret jibek sharýashylyǵy qolǵa alyndy. Báıdibek aýdanynda «Jibek jáne baý-baqsha ónimderi birlestigi» qurylyp, jibek qurtynyń azyǵy bolyp tabylatyn tut aǵashtary 25 gektar alqapta otyrǵyzyldy», - dedi J. Túımebaev.
