Ońtústik Qazaqstan oblysy astyqtyń rekordtyq ónimin jınap otyr
ASTANA. QazAqparat - Ońtústik Qazaqstan oblysy bıyl táýelsizdik jyldarynda buryn-sońdy bolmaǵan astyqtan rekordtyq ónim jınap otyr. Bul týraly búgin Astanada Ortalyq kommýnıkatsııalar qyzmetinde ótken baspasóz máslıxatynda Ońtústik Qazaqstan oblysy ákiminiń orynbasary Ulasbek Sádibekov málim etti.
«Aýyl sharýashylyǵy - ekonomıkamyzdyń mańyzdy salasy. Qajettilikke baılanysty egis alqaptaryn ártaraptandyrýǵa kóńil bólinýde. Ótken jylmen salystyrǵanda, maqta alqaptary 10,4 myń gektarǵa, ósimdik daqyldary 2,6 myń gektarǵa, jemis alqaptary 3,9 myń gektarǵa ulǵaıtyldy. Sonymen qatar elimizdiń táýelsizdik jyldarynda alǵashqy ret astyq ónimderi boıynsha rekordtyq kórsetkishke qol jetkizip otyrmyz. ıAǵnı bıyl ár gektardan 22 tsentnerden ónim alyp, 470 myń tonna astyq jınaldy», - dedi ákim orynbasary.
Onyń aıtýynsha, oblysta 462,6 myń gektar sýarmaly jer bar. Búgingi kúni sýarmaly jerlerdiń 94 paıyzy ıgerilgen. 2016 jyly qashyqtyǵy 531,1 shaqyrym 46 sý nysandaryn qalpyna keltirýge oblystan 3,7 mlrd teńge bólindi. Nátıjesinde 30 myń gektar jerdi sýarmaly texnologııamen qamtamasyz etý jaqsardy.
«Tamshylatyp sýarý texnologııasy qosymsha 6,3 myń gektarǵa endirilip, 50,4 myń gektarǵa jetti. ıAǵnı tamshylatyp sýarý bul da búgingi tańda aýyl sharýashylyǵynda mańyzdy máseleniń biri bolyp otyr. Jalpy respýblıkadaǵy úlesi 73 paıyzdy quraıdy. Jylyjaılar kólemi 87 gektarǵa artyp, 1 112 gektarǵa jetip otyr. Bul respýblıkadaǵy úlestiń - 87 paıyzy. Búgingi tańda osy jylyjaılar esebinen 120 myń tonna jemis ónimderi jınaldy», - deıdi ol.
«Sońǵy jyldary topyraqty óńdeýge jańa texnologııalar paıdalanýda. Tereń qopsytý texnologııasy 86 myń gektar alqapta qoldanylǵan. Nátıjesinde oblysymyzda osy texnologııany paıdalanǵan sharýashylyqtarda maqta ónimdiligi gektaryna 40-45 tsentnerge jetti. Al dástúrli jolmen ónim alý gektaryna 26-27 tsentnerden aspaıdy. Nátıjesinde aýyl sharýashylyǵynyń jalpy ónim kólemi 1 qyrkúıekte 220,8 mlrd teńgeni qurap, ótken jyldyń sáıkes kezeńimen salystyrǵanda, ósim 3,1 paıyzǵa jetti», - dep túıdi oıyn U. Sádibekov.
