Ońtústik Qazaqstan oblysy 2011-2012-shi oqý jylynda memlekettik bilim granttaryn eń kóp ıelengen óńir - QR BǴM
ASTANA. 6 qyrkúıek. QazAqparat /Gúlmıra Alıakparova/ - Ońtústik Qazaqstan oblysy 2011-2012-shi oqý jylynda memlekettik bilim granttaryn eń kóp ıelengen óńir retinde kósh bastap tur.
Bul týraly QR BǴM Joǵary jáne joǵary oqý ornynan keıingi bilim departamentinen málim etti.
Eger OQO memlekettik bilim granttaryn eń kóp ıelengen óńir retinde birinshi orynda bolsa, bilim granttaryn eń kóp ıelengen JOO-lardyń tizimin L.N.Gýmılev atyndaǵy Eýrazııa ulttyq ýnıversıteti bastap tur.
2011-2012-shi oqý jylyna bilim granttaryn taǵaıyndaý jónindegi konkýrsta eń kóp suranysqa - «Qarjy», «Halyqaralyq qatynastar», «Quqyqtaný», «Jalpy medıtsına», «Farmatsııa», «Meıirbıkelik is», «Qoǵamdyq densaýlyq saqtaý» mamandyqtary ıe boldy. Al aǵymdaǵy oqý jylynda bilim granttaryna eń kóp ıe bolǵan alǵashqy 10 mamandyqtyń reti kelesideı: «Jalpy medıtsına», «Kásiptik bilim», «Qurylys», «Shet el tili: eki shet el tili (aǵylshyn tili)», «Qoǵamdyq densaýlyq saqtaý», «Aqparattyq júıeler», «Kólik, kóliktik tehnıka jáne tehnologııalar», «Esepteý tehnıkasy jáne baǵdarlamalyq qamtamasyz etý», «Metallýrgııa» jáne «Mashına qurastyrý».
Eske salaıyq, Qazaqstan Respýblıkasy Úkimetiniń 2011 jyldyń 4 naýryzyndaǵy №232-shi Qaýlysyna sáıkes, 2011-2012-shi oqý jylyna joǵary bilim mamandaryn daıarlaýǵa 36 046 memleketik bilim granty bólindi, sonyń ishinde kúndizgi oqý bólimine - 35 046, syrttaıǵa - 1 000 grant. Bilim granttaryn alýǵa bıyl 91 018 adam baq talastyrdy.
