Ońtústik Qazaqstan memlekettik ýnıversıtetiniń bazasynda IT-ortalyq ashyldy

ShYMKENT. QazAqparat - «Nur Otan»  partııasy IT-mamandardy daıyndaý, bilim berý salasyn jetildire túsý maqsatynda  jańa jobalardy júzege asyra bastady.  Atalǵan joba aıasynda aldaǵy úsh jylda elimizde jumys berýshi  ІT-kompanııalar men iri joǵary oqý oryndarynyń bazasynda 20 ІT-ortalyq ashylyp, jylyna 35 myń adamǵa bilim berý josparlanyp otyr.

 Ońtústik Qazaqstan oblysy bilim basqarmasynyń málimetine sáıkes, 2018 jyly quny 4 mln 900 myń teńgeni quraıtyn, 3200 oqýshyny qamtıtyn 20 synyp, al 2019 jyly  8100 oqýshyny qamtıtyn 30 ІT-synyp  ashý josparlanýda. Ol synyptarda ІT-ortalyqtarda bilimin jetildirgen muǵalimder sabaq beretin bolady.

  Búgin jospar iske asyp, Shymkentte   IT- ortalyqtyń ashylý saltanaty ótti. Azamattardyń tsıfrlyq saýattylyqtaryn arttyrýǵa, bilim berý salasyn jetildirýge baǵyttalǵan IT- ortalyq «Nur Otan» partııasynyń «IT-mamandardy daıyndaý»  jobasy aıasynda iske asty. M.Áýezov atyndaǵy Ońtústik Qazaqstan memlekettik ýnıversıtetiniń bazasynda  ornalasqan IT-ortalyq zamanaýı 16 kompıýter, joǵary jyldamdyqtaǵy ınternet, qajetti veb-baǵdarlamalarmen jabdyqtalǵan.

-Búgin alǵashqy IT-ortalyq ashtyq. Ortalyqta IT salasyna qatysty qajetti aqparattar, túrli qyzmetter usynylyp, mamandar oqytylyp,  jańa tehnologııalarmen qamtamasyz etiletin bolady. Bul óz kezeginde halyqtyń tsıfrlyq saýattylyǵyn arttyrady, - deıdi oblys ákiminiń orynbasary  Tólegen Sársembaev.

Ortalyqtyń ashylý saltanatyna  «Nur Otan»  partııasy oblystyq fılıaly basshylyǵy, M.Áýezov atyndaǵy Ońtústik Qazaqstan memlekettik ýnıversıtetiniń rektory jáne oqytýshylary, oblystyq bilim basqarmasynyń  basshylyǵy, ortalyqta oqýǵa kelgen muǵalimder, partııa fılıalynyń qyzmetkerleri jáne de BAQ ókilderi qatysty.       

 - ІT-ortalyq halyqtyń  tsıfrlyq saýattylyǵyn arttyryp qana qoımaı, olardyń álemdik iri jobalarǵa qatysatyn básekege qabiletti maman bolyp qalyptasýyna jaǵdaı jasaıdy, -    deıdi nurotandyqtar.