Ońtústik Qazaqstan memlekettik pedagogıkalyq ýnıversıtetine Ózbekáli Jánibekovtiń esimi berilmek

ASTANA. QazAqparat – Ońtústik Qazaqstan memlekettik pedagogıkalyq ýnıversıtetine memleket qaıratkeri, etnograf, tarıh ǵylymdarynyń kandıdaty Ózbekáli Jánibekovtiń esimi berilmek, dep habarlaıdy QazAqparat tilshisi.

«Ońtústik Qazaqstan memlekettik pedagogıkalyq ýnıversıteti» kommertsııalyq emes aktsıonerlik qoǵamyna Ózbekáli Jánibekovtiń esimi berilsin», - delingen Ashyq NQA portalynda jarııalanǵan Ǵylym jáne joǵary bilim mınıstriniń buıryq-jobasynda.

Vedomstvo túsindirmesine saı, oqý ordasyna kórnekti qaıratkerdiń esimin berý onyń ǵylymǵa qosqan úlesin laıyqty baǵalaýǵa baǵyttalǵan.

«Ońtústik Qazaqstan pedagogıkalyq ýnıversıteti» kommertsııalyq emes aktsıonerlik qoǵamyna Ózbekáli Jánibekov esimin berý joǵary oqý oryndarynyń oqytýshylarynyń mártebesin arttyrady jáne qazaqstandyq ǵalymdardyń ǵylymǵa qosqan úlesiniń joǵary baǵasyn kórsetetin bolady», - dep túsindirme berilgen buıryqqa.

Qujat 24 shildege deıin kópshilik talqylaýda bolady. Keıin qol qoıý úshin vedomstvo basshysy Saıasat Nurbekke joldanady.