Ońtústik kásipkerleri órlep tur
ASTANA. QazAqparat - Ońtústik Qazaqstan oblysynyń ákimdigi, ındýstrıaldy aımaq jáne kásipkerlerge qyzmet kórsetý ortalyǵy baspasóz qyzmetteriniń uıymdastyrýymen baspasóz týry ótti. Onda ındýstrııalandyrý baǵdarlamasynyń bıylǵy jarty jyldyǵyndaǵy qorytyndylary jýrnalısterge tanystyryldy. Shara barysynda, sondaı-aq, ındýstrııalandyrýdyń ekinshi besjyldyǵyn júzege asyrýdyń jańa qadamdary jaıly sóz boldy. Bul týraly «Ońtústik Qazaqstan» gazetinde jazyldy.
«Ońtústik» ındýstrıaldy aımaǵy 2010 jyly boı kóterdi. Qazir munda 427 gektar jer paıdalanýǵa berilgen. 504 gektar jer jańa nysandar úshin kezegin kútip jatyr.
«Ońtústik» ındýstrıaldy aımaǵynda qazirge deıin 73,7 mıllıard teńgeni quraıtyn 71 joba júzege asqan. Munda búginde 6115 adam turaqty jumyspen qamtylǵan.
«HILL Corparation» JShS - Qazaqstandaǵy avtokólik motoryn maılaý materıaldaryn shyǵaratyn alǵashqy jáne biregeı zaýyt. Álemdik standarttarǵa saı ónim sheteldik materıaldarmen salystyrǵanda 15 paıyzǵa arzan ári sapaly. Zaýyt jylyna 24 myń tonna maı shyǵarýǵa qaýqarly. Qazir munda 226 adam turaqty jumyspen qamtylǵan.
Zaýyt memleketten 5,4 mıllıard teńge nesıe alǵan. JShS basshysy N.Dútbaevtyń aıtýynsha, kásiporyn budan bylaı kólik ıelerinen buryn qoldanylǵan maı qabyldaıdy. Ony qaıta óńdep, qajetine jaratady. Kúnine mıllıondaǵan mashınanyń maıy aýystyrylady. Onyń barlyǵy da jerge tógiletini sózsiz. Bul ekologııalyq jaǵynan da zııandy. Endigi jerde qoldanylǵan maıdyń ózi jerde qalmaıdy.
«Bıznestiń jol kartasy - 2020» baǵdarlamasy aıasynda qulashyn jaıa túsken «EvroKrıstall» JShS-niń táýligine 80 tonna shyny balqytýǵa qýaty jetedi. Túrli shyny ydystar shyǵarýǵa arnalǵan jobanyń birinshi kezeńi 2014 jyldyń tamyz aıynda iske qosylypty. Bul úshin óndiris ornynyń basshysy kásipkerlerdi qoldaýǵa arnalǵan «Damý» qorynyń kómegine júgingen. «Bıznestiń jol kartasy-2020» baǵdarlamasy aıasynda «Qazaqstannyń damý banki» aktsıonerlik qoǵamynyń kómegimen paıyzdyq mólsheri tómendetilgen qarjy alǵan. Investıtsııalyq somasy 3,9 mıllıard teńgeni quraǵan zaýytta búginde 253 adam jumyspen qamtylyp otyr. Óndiris qýattylyǵy jylyna 225 mıllıon danaǵa deıin shyny ydystaryn shyǵarýǵa tolyq jetedi.
Joba boıynsha bıyl seriktestik ekinshi kezeńdi iske qosýy kerek. Bıylǵy mamyr aıynan bastap táýligine 160 tonna shyny balqytatyn ekinshi pesh iske qosylypty.
Búginde túrli shyny ydystarǵa Qyrǵyzstan, Ózbekstan, Tájikstan respýblıkalary men Almaty, Qaraǵandy, Aqtóbe qalalaryndaǵy birneshe kásiporyn tapsyrys berip otyr.
Rýstam Sýhov basshylyq jasaıtyn kásiporynda óndiristik shynynyń hımııalyq jáne fızıkalyq qasıetterin saqtaýǵa baǵyttalǵan zerthana jumys isteıdi. Aıtalyq, Germanııada shyǵarylǵan «Heýe» qondyrǵysy shynylarǵa túrli pishin beredi. Óndirilgen shyny beriktigimen erekshelenedi. Sonymen birge shynylardyń sapasyn qamtamasyz etetin lazerlik skanerleý jumystary óz nátıjesin berýde. Óndirilgen ónimniń sapasy arnaıy qurylǵynyń kómegimen anyqtalady.
Qazir munda Eýropalyq jáne qaıta qurý banktiń qoldaýymen ISO 9000 sapa menedjmenti júıesin engizý jumystary júrgizilýde eken. Demek, endigi jerde sapa qatań baqylanady.
Jýrnalıstermen júzdesý barysynda kásiporyn qyzmetkeri Bekzat Berdimuratov óndiristik protsespen tanystyrdy. Shyny jasaý úshin eń áýeli kvartsty qum kerek. Sondaı-aq, buryn paıdalanylǵan shyny ydystar da kádege jaraıdy. Shyny qaınatatyn arnaıy peshte belgilengen mólshermen salynǵan shıkizat 1500 gradýsqa deıingi ystyqta qaınatylady eken. Bul degenińiz alapat aptap emes pe? Mine, osyndaı ot-jalynda 253 adam eńbek kórigin qyzdyryp jatyr. Endigi kezekte olar jasyl tústi ydystar shyǵarýdy qolǵa almaq.
Túrli ydystarǵa tyǵyn daıyndaıtyn «Spirit Kazahstan» JShS jemis-jıdek salatyn jáshikter de jasaıdy. Olar endigi jerde baklajka daıyndaýdy qolǵa alypty. Seriktestikke memleketten 1 mlrd. 200 mln. teńge qoldaý kórsetilipti.
Al, «BaigR Group» JShS-i túrli tósemder men fasadtyq panelder jasaıdy. «Maksımým» AIO JShS tarapynan memlekettik qoldaýǵa ıe bolǵan seriktestik jylyna 700 tonnaǵa deıin ónim shyǵara alady.
Press-týr kelesi kúni «Shymkent maı» AQ-da bastaldy. Jobalyq quny 1575 mıllıon teńgeni quraıtyn kásiporynnyń táýligine 300 tonna kúnbaǵys, 200 tonna maqta maıyn shyǵarýǵa múmkindigi bar. Tseh bastyǵy Gúlaıhan Shalqarovanyń aıtýynsha, ónim Qyrǵyzstan, Tájikstan, Iran jáne Ózbekstanǵa jóneltiledi.
«Ońtústik Qurylys Servıs» JShS-i temir-beton buıymdarynyń barlyq túrin shyǵarýǵa qabiletti. Munda shetelden ákelingen arnaıy qurylǵy túrli pishimdi qurylys materıaldaryn shyǵarýda taptyrmaıtyn kómekshige aınalǵan.
«Turǵyn úı qurylys jınaq banki» AQ arqyly qarjylandyrylǵan qurylys kompanııasy búginde seksenge jýyq adamdy jumyspen qamtyp otyr. Bas tehnolog Ordabek Serikbaevtyń aıtýynsha, seriktestik turǵyn úı salýǵa mashyqtanǵan. Qazir seriktestiktiń ózi basqalarǵa materıaldar jasap berýmen birge toǵyz qabatty 4 úıdiń qurylysyn júrgizýde.
«Tassaı» ındýstrıaldy aımaǵynda ornalasqan «Mega SMART» JShS-ine 345,2 mıllıon teńge ınvestıtsııa tartylǵan 40 adam jumys isteıtin tseh keńse jáne ashana jıhazdaryn jasaıdy eken. Seriktestik basshysy Sergeı Hegaı shıkizatty Reseıden aldyrtatynyn aıtyp ótti. Búginde seriktestik ónimderine jaqyn sheteldikter de tapsyrys bere bastapty.
Atalmysh kásiporyndar Astana kúni merekesine osyndaı qomaqty tartýlar syılaǵaly otyr.
