«Ońtústik» ındýstrııalyq aımaǵy óńirdiń damýyn jedeldetedi
ShYMKENT. QazAqparat - Ońtústik Qazaqstan oblysynyń ákimi Janseıit Túımebaev «Ońtústik» ındýstrııalyq aımaqta bolyp, ondaǵy birqatar iri kásiporyndardyń jumysymen tanysty.
Ondaǵy kásipkerlerge memleket tarapynan kórsetiletin qoldaýlardy atap ótip, óńirdiń ekonomıkasynyń damýyna aıtarlyqtaı úles qosyp otyrǵan isker azamattarmen pikir almasty, dep habarlaıdy QazAqparat HAA tilshisi.
Oblys ákimi birinshi bolyp ındýstrııalyq aımaqtaǵy shyny ydystar shyǵarý isimen tanymal «Evrokrıstall» zaýytynyń ónimimen tanysty. Ondaǵy óndiriletin ónimderdi gazdalǵan sýsyndar men shyryndar, alkogoldik jáne sút pen dári-dármekter shyǵaratyn zaýyttar qoldanady. Munda túrli qalypta - 200 ml-den 3 lıtrge deıingi tússiz jáne jasyl tústi bótelkeler men qutylar ázirlenedi. Osynaý ónimderge Qazaqstannyń barlyq aımaǵy men Qyrǵyzstannan tapsyrystar kelip túsýde. Jylyna 60 mln dana shyny shyǵarýǵa qaýqarly óndiris ornynda 150 adam eńbekpen qamtylǵan.
Zaýyt jumysymen tanystyrǵan kásiporyn ıesi aımaq basshysyna jumys isteý aıasyn keńeıtip, kómirqyshqyl gazyn óndirýdi qolǵa alyp jatqanyn jetkizdi. Ol úshin kásipker arnaıy ıtalııalyq qurylǵylardy da satyp alýdy josparlap qoıypty.
Munan bólek, aımaq basshysy shıfer shyǵaratyn kásiporyn «Tectum Enjineering» JShS-gin aralap kórdi.
Shıfer óndiretin alǵashqy kásiporyn «Bıznestiń jol kartasy - 2020» baǵdarlamasy aıasynda qarjylandyrylǵan. Joba quny 1,9 mlrd teńgeni quraıdy. Zaýyt «Hatchek» ádisimen ónim shyǵarady. Munda 200 adam jumyspen qamtylyp, shyǵarylǵan ónimniń 60 paıyzy ishki naryqqa, al qalǵan 40 paıyzy Tájikstan, Aýǵanstan men Ózbekstan elderine jóneltilýde. Zaýyt jylyna 2,3 mln dana shıfer óndirý múmkindigine ıe.
Indýstrııalyq aımaqqa jasaǵan sapary barysynda oblys ákimi «Shymkent Temir» JShS-niń bolat quıý zaýytynyń qurylysymen tanysty. 2018 jyly iske qosylatyn óndiristiń jalpy quny 4,2 mlrd teńge bolyp otyr. Jylyna 240 myń tonna ónim shyǵarýǵa qaýqarly kásiporyn iske qosylǵanda 150 azamat jumyspen qamtylmaq.
Sondaı-aq, ákim zamanaýı shyny shyǵarýda shetelden kem túspeıtin ári sáýlet qurylysynda qoldanýǵa yńǵaıly áınek shyǵaratyn «Fırma Dana» zaýytynyń ónimimen tanysty. Shyńdalǵan shyny óndiretin zaýyt táýligine 1700 sharshy metr áınek shyǵarady. Jańa tehnologııaǵa negizdelgen shyny qysta úıdegi jylýdy saqtasa, jazda bólmedegi temperatýrany birqalypty kúıde ustaıdy. Bul shynylardyń tıimdiligi jylý ótkizgishtiginde.
Sapar sońynda oblys ákimi Janseıit Túımebaev «Ońtústik» ındýstrııalyq aımaǵy óńirdegi aýdan, qalaǵa úlgi bolýy kerektigin aıtyp, onda ornalasqan kásiporyndardyń jumysyn oń baǵalady.
Aıta keteıik, munda jalpy somasy 55,8 mlrd teńge bolatyn bes myń jumys ornymen 85 joba júzege asyrylýda. Búgingi tańda quny 21,4 mlrd teńgeni quraıtyn 46 joba iske qosylyp, úsh myń adam jumyspen qamtylyp otyr.
