«Ońtústik» ındýstrııaldy aımaǵy ózin-ózi aqtady - OQO
ASTANA. QazAqparat - Ońtústik Qazaqstan oblysyndaǵy «Ońtústik» ındýstrııaldy aımaǵynyń qurylysyna memlekettik bıýdjetten 6,8 mlrd. teńge jumsalǵan. Búgingi tańda aımaqtaǵy kásiporyndardyń bıýdjettik aýdarymdary 7,2 mlrd. teńgege jetken. Nátıjesinde «Ońtústik» respýblıkada ózin-ózi aqtaǵan eń alǵashqy ındýstrııaldy aımaq bolyp otyr.
Sondaı-aq, aǵymdaǵy jyldyń 9 aıynda jalpy oblystaǵy ındýstrııaldy aımaq kásiporyndary 13,4 mlrd. teńgeniń ónimin óndirdi. Bul týraly OQO óńirlik kommýnıkatsııalar qyzmetinde ótken baspasóz máslıhatynda «Ońtústik» ındýstrııaldy aımaqtardy basqarýshy kompanııa basshysy Nýrken Begýlıev málimdedi, dep habarlady Ońtústik qazaqstan oblysy ákimdiginiń baspasóz qyzmeti.
2017 jyldyń 10 aıynda atqarylǵan jumystar jaıyn baıandaǵan kompanııa basshysy búginde aımaqqa oblys ákimi Janseıit Túımebaevtyń bastamasymen ınvestorlardy tartý boıynsha belsendi jumys júrgizilip keletinin atap ótti.
Sonymen birge, spıker qazirgi tańda Ońtústik Qazaqstan oblysy tartylǵan ınvestıtsııa boıynsha respýblıkada kósh bastap keletinin jetkizdi. Máselen 2017 jyly 20 mlrd. teńgeni quraıtyn 17 ınvestıtsııalyq jobamen kelisimshartqa qol qoıylǵan. Qazirgi tańda oblys kólemindegi ındýstrııaldy aımaqtarda 169 ınvestıtsııalyq joba júzege asyrylýda eken.
«Jalpy quny 155,2 mlrd. teńge kólemindegi jobalar boıynsha 9 myńnan astam adam jumyspen qamtylmaq. Al búgingi tańda quny 34,8 mlrd. teńgeni quraıtyn 68 joba iske qosylǵan. Bul kásiporyndarda 4 myń adam jumys isteýde. Aǵymdaǵy jyldyń sońyna deıin somasy 7,7 mlrd. teńge bolatyn 12 ınvestıtsııalyq jobany iske asyrý josparlanyp otyr. Osylaısha osy jyldyń sońyna deıin barlyq ındýstrııaldy aımaqtarda júzege asqan jobalardyń sany 80-ge jetedi», - dedi Nýrken Rahymuly.
Sonymen qatar, 2018 jyly jalpy somasy 38,6 mlrd teńgeni quraıtyn 11 jobany iske qosý josparlanyp otyr. Nátıjesinde kelesi jyldyń sońyna qaraı 6500-ge jýyq adam jumyspen qamtylatyn bolady.
Budan bólek, «Ońtústik» ındýstrııaldy aımaqtarynyń basqarýshy kompanııasy 2018-2020 jyldarǵa arnalǵan strategııalyq damý josparyn ázirlep jatyr. Onda oblystaǵy aýdan men qalalarda ındýstrıaldy aımaqtardy toltyrý máselesi qaralǵan.
