Ońtústik halqyn soltústikke qonystandyrý baǵdarlamasyna 85 mlrd. teńge bólindi

ASTANA. QazAqparat - Ońtústik halqyn soltústikke qonystandyrý baǵdarlamasyna 2017 jyly 85 mlrd. teńge bólingen. Bul týraly búgin Astanada «Korporatıvtik sektorda áıelderdiń múmkindigin keńeıtý» atty halyqaralyq forýmda QR Eńbek jáne halyqty áleýmettik qorǵaý mınıstri Tamara Dúısenova málim etti.

«Qazirgi ýaqytta ońtústik óńirlerden soltústikke qonystaný boıynsha baǵdarlama qolǵa alyndy. Alǵashqy jumystar bastalyp ta ketti. Eń birinshiden, Bilim jáne ǵylym mınıstrliginiń «Serpe» baǵdarlamasy aıasynda soltústik oblystarǵa stýdentter kelýde. Bizdiń baǵdarlama boıynsha da bul jumys jalǵasyn tabady. Bıyldyń ózinde bul baǵdarlamaǵa respýblıkalyq bıýdjetten 45 mlrd teńge, jergilikti bıýdjetterden - 40 mlrd. teńge qarastyrylǵan. ıAǵnı, 85 mlrd. teńge osy baǵdarlamany júzege asyrýǵa bólinýde», - dedi mınıstr.

Aıta keteıik, bunyń aldynda habarlanǵanyndaı, ońtústik óńirlerden soltústik oblystarǵa kóshýge nıetti adamdardy yntalandyrýdyń jańa baǵyttary engizildi. Birinshiden, qonys aýdarǵandardyń shyǵyndary 35 AEK kóleminde óteletin bolady, ıaǵnı otbasynyń árbir múshesine 79 myń teńge somasynda beriledi. Sonymen qatar bir jyl boıy kóship barǵan otbasynyń baspanany jaldaýǵa jumsaıtyn shyǵyndary sýbsıdııalanady.

QR Úkimeti anyqtaǵan óńirlerge erikti túrde qonys aýdarǵan tulǵalarǵa memlekettik qoldaý sharalary qarastyrylǵan. Jyl saıyn, óńirler men jumys berýshilerdiń eńbek resýrstaryna suranysyn eskere otyryp, ishki kóshi-qon kvotasy belgilenedi. Atalǵan kóshti yntalandyrý tetigi retinde, bastapqy beıimdelý jáne jol men júk tasý shyǵynyn óteý quraldarynan turatyn, qazirgi tańdaǵy áleýmettik paketti qoldaný jalǵasyn tabady. Osy jyly 2,7 myń azamattyń qonys aýdarýyna sýbsıdııa tóleý maqsat etilgen.