«Ońtústik-Tsırk» mekemesi elorda turǵyndaryna «Tumar patshaıym» qoıylymyn tartý etti

Qoıylymda saqtar dáýirindegi qazaq dalasyn mekendegen erkin, azat, rýhy bıik, qaısar halyqtyń ómiri kórsetilgen.

«Kórmeniń aıasynda 29 tamyz ben 3 qyrkúıek aralyǵynda Ońtústik Qazaqstan oblysynyń Astanadaǵy kúnderi uıymdastyrylyp jatyr. Osy oraıda óńirden 800-den astam ónerpazdar men óner sheberleri keldi. Sonyń ishinde «Ońtústik-Tsırk» mekemesinen de 63 tsırk ártisi óz ónerlerin pash etti. Búgingi tańda bizdiń tsırktiń arnaıy daıyndaǵan «Tumar» teatrlandyrylǵan tarıhı qoıylymyn kórermen nazaryna usynyp otyrmyz. Bul qoıylymdy tańdaý birneshe sebepke súıenip jasaldy. Munda Uly Dalanyń qadir-qasıetin urpaqqa nasıhattaıtyn halyqtyń qaısarlyǵy, tektiligi men danalyǵy, Tumar patshaıym men Kır patshasynyń arasyndaǵy qaqtyǵys keńinen kórsetildi. Osy qoıylymda eldi syrt jaýdan qorǵaýdyń mańyzdylyǵyna erekshe mán berilgen. Sonymen qatar osynda genderdik saıasatqa nazar aýdarylǵan, ıaǵnı qoıylymǵa Uly Dala qyzdarynyń qaısarlyǵy men batyrlyǵy arqaý boldy. Sondyqtan jas urpaqqa elikteýge turarlyq tulǵanyń bar ekenin, Tumarǵa uqsasa jaman bolmaıtyndyǵyn kórermen qaýymǵa kórsetkimiz keldi»,-dedi bas rejısseri Danııar Serikbaev.
 

Atap aıtqanda, tsırk janrlarymen qamtylǵan tarıhı beınelerdi Ońtústik-Tsırktiń ártisteri oınap shyqty. Qoıylym 95 mınýtty qamtıdy. Qoıylym barysynda kloýndar men akrobattar, áýe gımnasttary men qıynnan qıysqan trıýkter arqyly jaýyngerlik úlgisin kórsetetin at óneriniń jigitteri, jyrtqysh ańdar men jan-janýarlar álemi qyzyqty nómirlerimen jańa obrazdardy oınap shyqty.

«Bul qoıylymda basynan aıaǵyna deıin sıýjettik jeli men ıdeıa bar. Barlyq nómirler, oqıǵa birimen-biri etene baılanysty»,-dedi D. Serikbaev.

Aıta keteıik, OQO-da boı kótergen kúrdeli janrly tsırk ǵımaratyna kásibı mamandar toptastyrylyp, óńirdiń daryndy jastary kóptep qamtylyp, qıyndyǵy men qyzyǵy mol ónerge shyńdaldy. Búgingi kúnge deıin tsırk ártisteri respýblıkalyq, halyqaralyq baıqaýlarda top jaryp, birqatar belesterdi baǵyndyryp úlgerdi.