Ońtústik aımaqtarda sý tapshylyǵy qatty seziledi - Ekologııa mınıstrligi

ASTANA. QazAqparat – Sýarmaly eginshilikti sýmen qamtýda tapshylyq bar. Quzyrly vedomstvo atalǵan máseleni qalaı sheship jatyr? Bul týraly Ekologııa jáne tabıǵı resýrstar mınıstrligi Sý resýrstary komıteti tóraǵasynyń orynbasary Seıilbek Nurymbetov aıtyp berdi, dep habarlaıdy QazAqparat tilshisi.

«Sońǵy jyldary sýarmaly eginshiligi damyǵan elimizdiń ońtústik aımaqtarynda sý tapshylyǵy qatty sezilip otyr. Bıylǵy vegetatsııalyq kezeńniń turaqty ótýin qamtamasyz etý úshin, ótken jyldyń jeltoqsanynan bastap daıyndyq jumystary bastaldy. 2022-2023 jyldardyń vegetatsııaaralyq jáne vegetatsııalyq kezeńderindegi jumys jospary bekitildi. Onyń sheńberinde qazir birqatar is-shara iske asyrylyp jatyr», - dedi Seıilbek Nurymbetov ortalyq kommýnıkatsııalar qyzmeti alańynda ótken baspasóz máslıhatynda.

Onyń aıtýynsha, elimizde sý únemdeý tehnologııalary engizilip jatyr.

«Aldymen, fermerlerdi sýarmaly sýmen jáne joǵarǵy aǵysta ornalasqan sý qoımalarynan qosymsha sý jiberýdi qamtamasyz etý boıynsha irgeles memlekettermen jumys jasalyp jatyr. Ekinshiden, gıdrotehnıkalyq qurylystardaǵy jóndeý-qalpyna keltirý jumystary qolǵa alyndy. Úshinshiden, sýarý júıesiniń magıstraldyq jáne sharýashylyqaralyq kanaldary tazalanyp jatyr», - deıdi ol.