Ońtústik astananyń áleýeti joǵary
ASTANA. QazAqparat - Táýelsizdiktiń altyn besigi - Almaty shaharynyń el damýynda alar orny erekshe. Elimizdiń ekonomıkalyq, qarjylyq, mádenı jáne bilim ortalyǵy retinde Almatynyń búgingi hal-ahýaly memleket nazarynan tys qalmaı keledi.
Osy rette memleket basshysy N.Nazarbaev ońtústik astananyń negizgi damý baǵyttaryn naqtylap bergen bolatyn. «Almaty - úlken qala, ony basqarý kúrdeli mindet júkteıdi jáne bul osynda bolyp jatqan úderisterdi tereń taldaýdy qajet etedi. Investıtsııa tartý, memleket-jekemenshik seriktestigin damytý osy kezeńde jumystyń negizgi baǵyttarynyń biri bolýǵa tıis, - dedi Qazaqstan Prezıdenti.
Qazirgi tańda osy baǵyttar boıynsha aýqymdy ister atqarylyp, áleýmettik-ekonomıkalyq damýy úshin túrli sharalar jasalyp jatyr. Qalanyń áleýmettik-ekonomıkalyq damýynyń negizgi kórsetkishteri, ınvestıtsııalyq jáne ınfraqurylymdyq baǵdarlamalar da júıeli túrde júrgizilip keledi. Indýstrııalandyrý baǵdarlamasy boıynsha 39 joba iske asyrylýda. Aǵymdaǵy jyly quny 38 mlrd teńgeni quraıtyn 10 joba iske qosylatyn bolady. Atalǵan 10 jobanyń beseýi Túrksib aýdanynda, ekeýi - Medeý aýdanynda, ekeýi - Jetisý aýdanynda jáne bireýi Bostandyq aýdanynda júzege asyrylyp, 4,5 myń jańa jumys orny ashylmaqshy. EKSPO-2017 halyqaralyq kórmesiniń qurylysyndaǵy qazaqstandyq qamtý úlesin qamtamasyz etý aıasynda Almaty kompanııalarynyń 10 mıllıard teńge kólemindegi qarajatpen qatysatyny týraly memorandýmǵa qol qoıyldy. Al 2017 jylǵy Ýnıversıada nysandary boıynsha qazaqstandyq úles 57 paıyzǵa jetti.
Almaty ekonomıkasynyń ósimi jyl qorytyndysy boıynsha 2,5 paıyzǵa jetedi. Ónerkásiptik óndiris ósimi 2,2 paıyz boldy, ınvestıtsııalar 1,3 paıyzǵa ulǵaıdy, bir mıllıon sharshy metrden astam baspana paıdalanýǵa berildi. «Nurly jol» baǵdarlamasy boıynsha bólingen qarjynyń 73 paıyzy ıgerildi, jyl aıaǵyna deıin 100 paıyzdyq kórsetkish qamtamasyz etiledi. Osy baǵdarlama arqasynda 2,6 myń jumys orny, jyl basynan beri 17 myńnan astam turaqty jumys orny ashyldy.
Almatyda 10 adamnyń altaýy shaǵyn jáne orta bıznes kásiporyndary arqyly jumyspen qamtylǵan, olardyń sany 10 paıyzǵa kóbeıdi. Bul sektor salyq túsimderiniń 44 paıyzyn qamtamasyz etedi. Sonymen qatar, eldegi shaǵyn jáne orta bıznes nesıe qorjynynyń 50%-y Almaty qalasynyń enshisinde tıesili. Al aǵymdaǵy jyldyń qańtar-sáýir aılaryna arnalǵan málimet boıynsha, ShOB ókilderine berilgen nesıe kólemi 358,2 mlrd. Teńgeni quraıdy.Ońtústik astana ákimi B.Baıbek: «Almaty - jeke kásipkerliktiń qalasy, al bul Qazaqstan ekonomıkasynyń besinshi bóligi. Daǵdarys jaǵdaıyna qaramastan, qalanyń damý qarqynyn arttyrý kerek. Qalamyzdyń osyndaı myqty ekonomıkalyq qýaty bar ekendigi qýantady. Endi bizge damý tetikterin izdep, «Almaty - 2020» baǵdarlamasyn damytý úshin aıasynda azamattyq qoǵam, kásipkerlik jáne jergilikti atqarýshy oryndaryndyń birligi kerek»,- degen bolatyn.
Almaty qalasy Qazaqstandaǵy bıznes pen kapıtaldyń ortalyǵyna aınalyp otyr. Megapolıs memlekettik JІÓ-niń 21%-yn, salyq túsiminiń 31%-yn beredi. Shaǵyn jáne orta bıznes jalpy óńirlik ónimniń 34%-yn qurasa, jergilikti bıýdjet kirisiniń 43%-y osy saladan quıylady. Sonymen qatar, bıznesti damytý úshin Almatynyń 2020 jylǵa deıingi damý baǵdarlamasynyń jeti tujyrymynyń úsheýi bıznesti damytýǵa baǵyttalǵan. Al árbir on almatylyqtyń altaýy shaǵyn kásipkerlikte eńbek etedi. Bul kórsetkishterdiń barlyǵy Almaty qalasynyń bolashaǵy jarqyn ekendigin kórsetedi.
