«Ońtústik» AIO jarty jylda 2000-ǵa jýyq jobaǵa qoldaý kórsetti
ASTANA. QazAqparat - «Ońtústik» aımaqtyq ınvestıtsııalyq ortalyǵy 8 jyldan beri oblys turǵyndaryna jeńildetilgen nesıe berý arqyly kásipkerlerge qoldaý kórsetip keledi. Búginge deıin kompanııa 48,8 mlrd. teńgeni quraıtyn 16 240 jobany qarjylandyrǵan, dep habarlaıdy oblystyq ákimdiktiń baspasóz qyzmeti.
Nátıjesinde oblysymyzdaǵy 16 myńnan asa kásipker óziniń bıznesin ashyp, ilgeriletýge kompanııadan qarjylaı qoldaý tapqan. Júzege asyrylǵan jobalar aıasynda 40 907 jańa jumys oryndary ashylǵan.
Al, «OŃTÚSTІK» AIO enshiles «Yrys» mıkroqarjy uıymymen birlese otyryp, jyl basynan beri 4,9 mlrd. teńgeni quraıtyn 1 903 jobany qarjylandyryp úlgergen. Júzege asyrylǵan jobalar nátıjesinde 3 994 jańa jumys oryndary ashylmaq. 
Qarjylandyrylǵan jobalardyń 56,3 paıyzy mal sharýashylyǵyn damytýǵa baǵyttalǵan. Atalǵan baǵytta 2,75 mlrd. teńgeni quraıtyn 941 joba qarjylaı qoldaý taýyp otyr. Odan bólek, kóktemgi dala jumystaryn júrgizý jáne egin sharýashylyǵy boıynsha 1,7 mlrd. teńgege 894 joba, jylyjaı sharýashylyǵy boıynsha 148,2 mln. teńgege 41 joba qarjylandyrylyp, 128,2 mln. teńgeni quraıtyn 7 aýyl sharýashylyq tehnıkasy lızıngke berilgen.
Aıta keteıik, kompanııa óziniń birneshe artyqshylyqtarymen erekshelenip keledi. «OŃTÚSTІK» aımaqtyq ınvestıtsııalyq ortalyǵyndaǵy paıyzdyq mólsherleme 7-8 paıyz ıaǵnı tómen bolýymen birge nesıeni rásimdeý barysynda qosymsha tólemder, komıssııalar alynbaıdy. Nesıeni óteý kestesi ár kásipker úshin jeke qarastyrylyp, ıkemdi túrde jasalyp beriledi. Aýyldyq jerlerdegi jyljymaıtyn múlik, saman úıler de naryqtyq baǵamen baǵalanyp, kepilge alynady. Sondaı-aq, aýyl turǵyndaryna yńǵaıly jaǵdaı jasaý maqsatynda ár aýdan ortalyqtarynda enshiles uıymnyń ókilderi jumys jasaıdy.
