Ońtústik agrarııleriniń oramjapyraǵyn óńir ákimdikteri satyp alatyn boldy
Túrkistan oblysynyń agrarııleri bıylǵy jyly 8 myń gektar alqapqa erte shyǵatyn oramjapyraqty egip, sáýir jáne mamyr aılarynda 300 myń tonnaǵa jýyq ónim alýdy josparlap otyr. Sharýalar Tótenshe jaǵdaı kezinde ósirilgen ónimdi saqtaý jáne satý barysynda qıyndyqqa tap bolamyz dep alańdaýshylyq bildirgen bolatyn.
«QR AShM fermerlerge kómek retinde dúısenbi kúni oblys ákimdikterimen keńes ótkizip, oblystardy ózara azyq-túlik qory týraly aqparatpen almasyp, tapshylyq baıqalǵan aımaqtarǵa ónimniń mol qory bar óńirlerden taýar almasýǵa shaqyrdy.
Nátıjesinde respýblıkanyń barlyq óńiriniń jergilikti atqarýshy organdary jaqyn arada Qazaqstannyń ońtústiginen 50 myń tonna erte shyǵatyn oramjapyraqty satyp alýǵa daıyn ekendikterin habarlady.
Sonymen qatar, Aýyl sharýashylyǵy mınıstrligi ónimdi eksporttaý úshin qajetti fıtosanıtarııalyq sertıfıkattardy jedel túrde berýde. Endi fermerler qalǵan 250 myń tonna ónimdi Reseı Federatsııasyna esh kedergisiz sata alady», - dedi mınıstrlikten.
Málim etilgendeı, búgingi tańda Shymkent jáne Túrkistan oblystary boıynsha 14 aýyl sharýashylyǵy taýaryn óndirýshi 4 myń tonnaǵa jýyq oramjapyraqty eksporttaýǵa 204 fıtosanıtarııalyq sertıfıkat aldy.
«Tez buzylatyn ónimderdi kedergisiz tasymaldaý úshin fermerlerdiń avtokólikterine «#BizBirgemiz Túrkistan oblysynyń azyq-túlik ónimderi» degen jazbamen logotıp jabystyrylady. Mundaı japsyrmalar fıtosanıtarııalyq jáne karantındik sertıfıkattarmen birge beriletin bolady», - dedi AShM-nan.
Eske salaıyq, otandyq agrarııler erte pisetin oramjapyraqty eksportqa shyǵara almaı otyrǵanyna shaǵymdanǵan bolatyn. Keıin QR AShM oramjapyraqty alys jáne jaqyn shet elderge eksporttaýdy toqtatýdy josparlamaǵanyn jáne tyıym salmaǵanyn málim etti. Sondaı-aq oramjapyraqty Eýrazııalyq ekonomıkalyq odaq elderine jetkizýge sertıfıkattar shtattyq rejımde berilip jatqanyn aıtty.