Ońtústik Afrıkanyń boıjetkeni «Ǵalamshar arýy» atandy
ALMATY. QazAqparat - Ońtústik Afrıka Respýblıkasynyń ókili Demı-Lı Nel-Peters «Ǵalamshar arýy - 2017» halyqaralyq sulýlyq baıqaýynyń jeńimpazy atandy, dep habarlaıdy «QazAqparat» HAA atalmysh baıqaýdyń resmı saıtyna silteme jasap.
Baıqaý fınaly AQSh-tyń Las-Vegas qalasynda ótti. Aq altynnan jasalyp, jaqut jáne gaýhar tastarmen kómkerilgen tájdi 22 jastaǵy boıjetkenniń basyna baıqaýdyń ótken jylǵy jeńimpazy frantsýz qyzy Irıs Mıttenar kıgizdi.
«Jetelegen armandarymnyń sońyna budan ári de ilese beremin. Qandaıda bir jetistikke jetý úshin múmkindikterdi kútý kerek degenge esh senbeımin. Kerisinshe, múmkindikti týdyra bilýiń kerek»,- dedi jeńimpaz marapattaý sátinde sóılegen sózinde.
Demı-Lı bıznes jáne menedjment fakýltetiniń túlegi. Ońtústik Afrıka «Ǵalamshar arýy» báıgesinde sońǵy márte sonaý 1978 jyly top jarǵan bolatyn. Ǵalamshardyń eń sulý arýy ataǵy úshin 89 eldiń boıjetkeni talasty. Birinshi vıtse-mıss kolýmbııalyq Laýra Gonzales atansa, ekinshi vıtse-mıss mártebesine ıamaıkalyq Davına Benet laıyq dep tanylǵan.
Esterińizge sala keteıik, baıqaýǵa Qazaqstannyń atynan «Almaty arýy - 2016» ataǵynyń ıegeri Kamıla Asylova qatysty. Ol Almatydaǵy estrada jáne tsırk kolledjinde oqıdy jáne aktrısa bolýdy armandaıdy. Ulttyq kıimder baıqaýynda Kamıla otandyq dızaıner Malıka Úsipovanyń kóılekterin kórsetti.
«Kamıla fınaldyq TOP-16-ǵa ótpese de, Qazaqstandy joǵary deńgeıde tanystyra bildi. Kamıla, biz seni maqtan tutamyz»,- dep jazdy «Mıss Qazaqstan» baıqaýynyń qatysýshylary Instagram-daǵy paraqshalaryna.
«Ǵalamshar arýy» baıqaýy alǵash ret 1952 jyly AQSh-ta ótti.
