Ońtústik Afrıkadaǵy sý tasqyny 300-deı adamnyń ómirin qıdy
IOHANNESBÝRG. QazAqparat – Ońtústik Afrıka Respýblıkasynyń Kvazýlý-Natal provıntsııasyndaǵy sý tasqyny kem degende 300 adamnyń ómirin qıdy, dep habarlaıdy QazAqparat Africa News-ke silteme jasap.
Eki kún buryn bastalǵan nóser jańbyr sońǵy 60 jylda bolmaǵan iri sý tasqynyna ákeldi. Keıbir aýdandarda birneshe aılyq jaýyn mólsheri birden jaýyp, sý kóshkini júrdi.
«13 sáýirde keshkisin bizge Kvazýlý-Natal provıntsııasyndaǵy sý tasqynynan qaza tapqandardyń sany 306 adamǵa deıin jetkeni habarlandy», - deıdi tabıǵı apattar saldaryn joıý jónindegi basqarmanyń baspasóz hatshysy Nonala Ndlový.
El prezıdenti Sırıl Ramafosa Dýrban qalasynyń mańyndaǵy sý tasqyny men kóshkinnen zardap shekken eldi meken turǵyndarymen kezdesip, kómektesýge ýáde berdi. Ol bul apat klımat ózgerýiniń bir kórinisi ekenine toqtaldy.
Oqıǵa ornynda izdestirý-qutqarý jumystary jalǵasyp jatyr. Soǵan qaraǵanda, zardap shekkenderdiń sany artýy múmkin.
Jyl basynda Afrıka qurlyǵynyń ońtústik-shyǵys jaǵalaýynda «Ana» tropıkalyq daýylynan sý tasqyny bolyp, 46 adam mert bolǵan edi.
