Ońtústik Afrıkada jarty ǵasyrda birinshi ret zýlýstar patshasy ulyqtaldy

ASTANA. QazAqparat – Ońtústik Afrıkanyń Dýrban qalasynda Mısýzýlý Sınkobıle Zýlýdy ulyqtaý rásimi ótti. Ol zýlýstar patshasy tıtýlyn tamyz aıynda qabyldaǵan bolatyn, dep habarlaıdy QazAqparat BBC-ge silteme jasap.

Ulyqtaý saltanatynda Mısýzýlý Sınkobıle Zýlý OAR Prezıdenti Sırıl Ramafosadan resmı rastaý kýáligin aldy. Bul – monarhtyń ákesi Gýdvıllý Zvelıtını ulyqtalǵan 1971 jyldan beri bolmaǵan tarıhı oqıǵa.

Jańa kósemniń bılik basynda 50 jylǵa jýyq otyrǵan ákesi 2021 jylǵy naýryzda qaıtys boldy. Onyń 6 áıeli jáne 26 balasy bar. Mısýzýlý patshanyń anasy regent-patshaıym bolyp taǵaıyndalǵannan keıin, arada bir aı ótkende kenetten dúnıe salyp, bul patsha saraıyndaǵy taqqa talasty ýshyqtyra túsken edi. Ulyqtaý rásimi bılik úshin júrgen uzaq ta qatal kúresti toqtatty.

Memlekettik ulyqtaý saltanaty Mozes Mabıda stadıonynda ótti. Rásimge dástúrli kıim kıingen myńdaǵan zýlýs azamaty jınaldy.

«Bul – qýanyshty oqıǵa jańa dáýirdiń bastaýy», - dedi Kvazýlý-Natal ýnıversıtetiniń afrıka tilderi professory Sıhavýkele Ngýbane.

Aıta ketsek, zýlýstar – Ońtústik Afrıka halqynyń besinshi bóligin alatyn iri etnıkalyq top. Eldiń salyq tóleýshiler esebinen qarjylandyrylatyn jyldyq bıýdjeti 3,6 mln dollardan asady.