Ońtústik Afrıkada pilderdi mına izdeýge úıretýde
ASTANA. QazAqparat - Afrıka pilderiniń ıis sezý qabileti tipti ıtterden de kúshtirek, olar jer astyna kómilgen mınany alystan taba bilýge qabiletti.
Buǵan Iohannesbýrgke jaqyn mańdaǵy fermalardyń birinde alyp janýarlardy mınany izdeýge úırete bastaǵan OAR bıologtary senimdi.
Pilderge arnalǵan «oqý kýrsyn» AQSh-tyń áskerı-zertteý uıymdarynyń biriniń qatysýymen ońtústikafrıkalyq «Adventures with Elephants» kompanııasy uıymdastyrǵan.
Synaq jasaýshylar qazirdiń ózinde birshama ilgerileýshilike qol jetkizgen syńaıly. 17 jasar pil Chıshýrý qatar qoıylǵan shelekterdi ıiskegen kezinde, trotıl salynǵandaryn sezip toqtaıdy da, aldyńǵy aıaqtarynyń birin kóteredi. Eshbir qatelesken emes.
«Bulardyń muryndarynyń sezý qabileti ǵajaıyp»,- dep tańdanady atalmysh kompanııanyń mamany Shon Hensmen.
Aıta keter bolsaq, alǵash ret mınadan tazartýǵa pilderdi paıdalaný ıdeıasyn angolalyqtar qolǵa alǵan. Olardyń aldynda 1990 jyldary 30 jylǵa sozylǵan azamattyq soǵystan keıin mına kómilgen jerlerdi tazartý jumystary turǵan edi.
Angolada uzaq jyldar boıy kólik joldary men egis tanaptarynda júrý óte qaýipti bolatyn. Adamdar pilderdiń qaýipti sezip, árqashan mınaly alańdardy aınalyp ótetindikterin baıqaǵan. Tipti sol shaqta pil tumsyqtarynyń erekshe qasıetke ıe ekendigi jaıly ańyz da paıda bolǵan-dy.
Budan keıin Zımbabve de pilderdi paıdalana bastady. Olardyń kómegimen brakonerlerdiń izine túsip, ustaıtyn bolǵan.
