Ońtústik Afrıkada aýrýhana mańynda janarmaı tasıtyn kólik jaryldy

ASTANA. QazAqparat - Ońtústik Afrıkada 60 myń lıtr suıytylǵan kómirsýtekti gaz tasymaldaıtyn júk kóligi jaryldy. Keminde 15 adam qaza taýyp, ondaǵan adam jaraqat aldy, dep habarlaıdy QazAqparat Euronews arnasyna silteme jasap.

Oqıǵa Iohannesbýrgten 20 shaqyrym jerde ornalasqan Boksbýrg qalasyndaǵy turǵyn aýdanda bolǵan. Júk kóligi alasa kópirdiń astynda qalyp qoıǵan, órt úıkelisten shyqqan. Qazir tergeý amaldary júrgizilýde.

Mańaıdaǵy temir joldar tolyǵymen qırap, ǵımarattar, sonyń ishinde aýrýhana ǵımaraty zaqymdanǵan. Naýqastardy evakýatsııalaýǵa týra keldi, qaza tapqandardyń arasynda osy medıtsınalyq mekemeniń birneshe qyzmetkeri bar. 24 naýqas pen 13 medıtsına qyzmetkerin aýyr kúıik shaldy, aýrýhananyń kire berisinde jáne kólik turaǵynda basqa da adamdar jaraqat aldy.