Ońtústik Afrıka men Qytaıdan koronavırýsqa qarsy jalǵan vaktsınalar tabyldy
NUR-SULTAN. QazAqparat - Qytaı men Ońtústik Afrıka polıtsııasy koronavırýsqa qarsy myńdaǵan jalǵan vaktsına tárkiledi, al Interpol bul «aısbergtiń tek basy» ǵana bolýy múmkin dep eskertedi, dep habarlaıdy interpol.int.
Interpoldyń 3 naýryzdaǵy esebinde Ońtústik Afrıka polıtsııasy jalǵan vaktsınalar jasaıtyn jelini joıǵany aıtylǵan.
Ońtústik Afrıka polıtsııasy jaqynda sol eldiń Gaýteng provıntsııasyndaǵy qoımadan koronavırýsqa qarsy 2400 doza jalǵan vaktsına men jalǵan 3M maskalardyń tárkilengenin jáne sol jerde 3 qytaı azamaty men 1 zambııalyqtyń tutqyndalǵanyn habarlady.
Sonymen qatar, Qytaı polıtsııasy osy jyldyń aqpan aıynda zaýytta jalǵan vaktsınalar jasady degen kúdikpen 80 adamdy ustady jáne kem degende 3000 doza vaktsına tárkiledi.
Qytaıdyń Qoǵamdyq qaýipsizdik mınıstrliginiń ókili quqyq qorǵaý organdarynyń tıisti sharalary vaktsınamen baılanysty qylmystarmen kúresýge baǵyttalǵanyn jáne osyǵan uqsas qylmystardyń aldyn alý úshin Interpolmen jáne basqa elderdegi polıtsııamen yntymaqtastyq ornatylǵanyn málimdedi.
Interpoldyń bas hatshysy ıÝrgen Stok bul vaktsınamen baılanysty qylmystardyń basy, shaǵyn bir bóligi ǵana dep sanaıdy. Ótken jyldyń jeltoqsan aıynda uıym 194 múshe memleketke jalǵan vaktsınalardan saq bolý týraly eskertý jasap, jalǵan medıtsınalyq zattardy qalaı ajyratý kerek degen baǵytta keńes bergen.
Interpol habarlamasynda ınternette satylatyn vaktsınalar zańdy ónim bolmaýy jáne synaqtan ótpeýi múmkin ekeni basa aıtylady. Jalǵan vaktsınalardy qoldaný ómirge qaýip tóndirýi múmkin.
