Ońtústik Afrıka elinde ushaq apatqa ushyrady
ASTANA. QazAqparat - Seısenbi kúni Ońtústik Afrıka Respýblıkasynyń astanasy - Pretorııanyń Vanderbým áýejaıyna jaqyn mańda ushaq apaty boldy. Saldarynan kem degende bir adam qaza bolyp, taǵy 20-ǵa jýyǵy zardap shekti. Bul týraly jergilikti shuǵyl medıtsınalyq qyzmettiń Twitter-degi paraqshasynda aıtyldy, dep habarlaıdy TASS.
«Vanderbýmdegi áýe apaty saldarynan bir adamnyń qaza bolǵany habarlanýda», - delingen aqparatta.
Ońtústikafrıkalyq «Aıýıtnes nıýs» radıostansasy áýejaı ókiline silteme jasap habarlaýynsha, ushaq charterlik reıspen júkterdi tasymaldap kele jatqan jáne apatqa ushyraǵan kezde fabrıkanyń ǵımaratyna soǵylǵan. Oqıǵaǵa qozǵaltqyshtardyń biriniń isten shyǵýy sebep bolýy múmkin.
News24 jańalyqtar portalynyń málimetinshe, ushaq charterlik júk tasymaldaryn oryndaıtyn MAC Martin's Air Charter gollandııalyq kompanııasyna tıesili. Oqıǵa ornynda apattyq qyzmetter, jedel járdem mamandary jáne qutqarýshylar jumys isteýde. Áýe kemesiniń bortynda bolǵan 20-ǵa jýyq adam zardap shekti.
