Ońtaılandyrýdyń arqasynda qarjy únemdeledi - Atamurat Shámenov
ASTANA. QazAqparat - Úkimetti Ońtaılandyrýdyń arqasynda qarjy únemdeledi. Bul týraly «Aıqyn» gazetinde jarııa bolǵan «Úkimettiń ońtaılanýy eńbek tıimdiligin arttyryp, jaýapkershilikti kúsheıtedi me?» taqyrybyndaǵy saýalnamada ekonomıka ǵylymdarynyń doktory, professor Atamurat Shámenov aıtty.
«Birinshiden, ońtaılandyrýdyń arqasynda qarjy únemdeledi. Ekinshiden, taza mamandar, eńbekqor jandar jumysta qalady. Jalpy, jumysqa «júrdim-bardym» qaraıtyndardyń bárin tazalaý kerek. Sonda kásipqoı mamandar óz tirligine úlken yntamen, qushyrlana kiriser edi. Qysqasy, Úkimettiń quramynda qan jańartý júrgizildi dep esepteımin. Eýropa elderinde basy artyq qurylym degen bolmaıdy. Bári óz isine jaýap beredi. Bizde osyndaı reformalar jasaı otyryp, soǵan kelýimiz kerek. Bizde sheneýnik kóp. Biraq sapasy kem. Muny Elbasy bilmeı otyrǵan joq. Bilgen soń osyndaı qadamdar jasaýǵa umtyldy. Aldaǵy ýaqytta jumys jandanyp, ilgerileýimiz shapshańdaı túsetin shyǵar dep oılaımyn», - dedi professor.
