Onshaqty stýdentti taqyrǵa otyrǵyzyp ketken Petropavl turǵyny ustaldy

PETROPAVL. QazAqparat – Petropavlda 10 shaqty stýdentti 2 mln teńgege aldady degen kúdikpen 20 jastaǵy jigit ustaldy, dep habarlaıdy QazAqparat tilshisi.

Soltústik Qazaqstan oblysy polıtsııa departamenti baspasóz qyzmetiniń málimetinshe, petropavldyq polıtseıler birneshe alaıaqtyq qylmys jasaǵan kúdiktini ustady.

Ol qurbandaryn tanystary arqyly taýyp, stýdentterge syıaqy úshin uıaly telefon alýǵa taýarlyq nesıe resimdeýdi usynǵan.

Keıin «banktegi tanysy» arqyly nesıeni ótep beretinin aıtqan.

Jábirlenýshiler alǵan telefondaryn alaıaqqa berip, ýáde etilgen 10 myń teńgeni alǵan, alaıda belgili bir ýaqyttan keıin nesıeleriniń jabylmaǵanyn bilgen.

Jedel ýákilder kúdiktini ustady. Ol 20 jastaǵy Petropavl turǵyny bolyp shyqty.

Atalǵan fakti QR Qylmystyq kodeksiniń 190-baby 3-bóligi boıynsha tirkeldi. Kúdikti qamaýǵa alyndy.

«Qazirgi ýaqytta iste 10 shaqty epızod bar. Kelgen shyǵyn somasy - 2 mln teńgege jýyq. Jábirlenýshilerdi anyqtaý boıynsha jumys júrgizilip jatyr. Aıta ketetini, barlyǵy derlik - stýdentter, jasy kúdiktimen shamalas. Olar nesıe resimdeý úshin jeke málimetterin bergen. Endi alaıaq qurbandarynyń nesıesin «banktegi tanysy arqyly» emes, ózderine tóleýge týra keledi. Eki aı buryn dál osyndaı alaıaqty ustaǵan edik. Kúmándi usynystardy qabyldamaýǵa jáne jeke málimetterdi eshkimge bermeı, saq bolýǵa shaqyramyz», - deıdi Petropavl qalalyq polıtsııa basqarmasynyń bastyǵy Jandos Muqatov.