Óńirlik JOO-lar ǵylym men ınnovatsııanyń óńirlik ortalyqtaryna aınalýy tıis — Quryltaı depýtaty
ASTANA. KAZINFORM — Ýnıversıtetterdiń korporatıvtik basqarý tetikterin kúsheıtip, olardyń jaýapkershiligin arttyrý qajet. Bul týraly Quryltaı otyrysynda depýtat Nurlan Dýlatbekov aıtty.
Ol Ǵylym jáne joǵary bilim mınıstri Saıasat Nurbekke depýtattyq saýal joldap, joǵary bilim men ǵylym júıesin odan ári jetildirýde sheshimi talap etiletin birqatar júıeli máseleni atady.
— Birinshiden, ýnıversıtetterdiń naqty avtonomııasyn qamtamasyz etý qajet. Qoldanystaǵy zańnamada akademııalyq derbestik kózdelgenimen, memlekettik joǵary oqý oryndary basqarý jáne qarjylyq máselelerde áli de ortalyqtandyrýǵa táýeldi. Ýnıversıtetterdiń korporatıvtik basqarý tetikterin kúsheıtip, olardyń jaýapkershiligin arttyrý mańyzdy, — dedi ol.
Onyń paıymynsha, ekinshiden, óńirlik ýnıversıtetterdi damytý máselesi ózekti. Ǵylymı áleýet pen qarjylandyrýdyń basym bóligi iri qalalarda shoǵyrlanǵan. Óńirlik joǵary oqý oryndary kadr daıarlaý ǵana emes, ǵylym men ınnovatsııanyń óńirlik ortalyqtaryna aınalýy tıis.
— Úshinshiden, ǵylymı kadrlardyń turaqty mansaptyq júıesin qalyptastyrý qajet. Jas ǵalymdardy qoldaý, óńirlerge tartý, ǵylymı ınfraqurylymǵa qoljetimdilikti keńeıtý jáne qosymsha yntalandyrý sharalaryn engizý mańyzdy, — dedi Quryltaı depýtaty.
Osyǵan baılanysty Nurlan Dýlatbekov Ǵylym mınıstrinen myna máselelerdi qarastyrýdy surady:
— memlekettik ýnıversıtetterdiń avtonomııasyn keńeıtý jáne korporatıvtik basqarý qaǵıdattaryn damytý;
— óńirlik ýnıversıtetterdi ǵylym, ınnovatsııa jáne aýmaqtyq damý ortalyqtary retinde qoldaýdyń keshendi baǵdarlamasyn ázirleý;
— ǵylymı mansaptyń úzdiksiz júıesin qalyptastyrý jáne ǵalymdardy óńirlerge tartý úshin qosymsha yntalandyrý tetikterin engizý.
— jastar sany qarqyndy ósip otyrǵan óńirlerde jańa ýnıversıtettik ortalyqtar qurý múmkindigin qarastyrý.
Aıta keteıik, otyrysta depýtattar qylmyspen kúres, memleketaralyq izdestirý jáne kıberqylmysqa qarsy is-qımyl salalaryndaǵy yntymaqtastyqqa qatysty zań jobalary qaraldy.
