Óńirlik standarttar júıesine sáıkes kórsetkishteri joǵary ne tómen óńirler qaısysy
ASTANA. KAZINFORM – Ulttyq ekonomıka mınıstrligi Óńirlik standarttar júıesine sáıkes kórsetkishteri joǵary ne tómen turǵan óńirlerdi atady.
— Mınıstrlik jergilikti atqarýshy organdarmen birlese otyryp, jyl saıyn Óńirlik standarttar júıesine (budan ári — ÓSJ) sáıkes eldi mekenderdiń obektilermen jáne kórsetilgen qyzmettermen qamtamasyz etilý deńgeıine monıtorıng júrgizedi. bilim berý, densaýlyq saqtaý, áleýmettik qamsyzdandyrý, mádenıet jáne sport, demalys, kólik, jol jáne ınjenerlik ınfraqurylym, qaýipsizdik pen qorshaǵan ortany qorǵaýdy qamtamasyz etý, ınfokommýnıkatsııa, turmystyq qyzmet kórsetý jáne qyzmet kórsetý ınfraqurylymy salalaryn qamtıtyn 12 baǵyt boıynsha ınfraqurylymnyń jaı-kúıin jáne oǵan qajettilikti kórsetetin obektiler men kórsetkishterdi qamtıdy, — dep atap ótedi mınıstrlikten agenttik saýalyna oraı.
Vedomstvonyń málimetinshe, atalǵan júıege sáıkes qamtamasyz etýdi esepteý árbir oblys boıynsha jeke júrgiziledi. Bul tıisti obektiler men qyzmetterdiń qoljetimdilik deńgeıin anyqtaýǵa múmkindik beredi.
— Óńirler boıynsha Óńirlik standarttar júıesine sáıkes obektilermen jáne kórsetilgen qyzmettermen (ıgiliktermen) qamtamasyz etý boıynsha Almaty (92,1%), Shymkent (88,1%), Astana (89,3%) qalalary, Mańǵystaý (71,3%) jáne Pavlodar oblystary (69,2%) kósh bastap tur. Tómen kórsetkishter qaıta qurylǵan Abaı (56,3%) jáne Ulytaý (59,0%) oblystarynda baıqalady, — dedi vedomstvodan.
Qazirgi ýaqytta Óńirlik standarttar júıesi kórsetkishterine sáıkes óńirler arasyndaǵy alshaqtyqty azaıtý maqsatynda birqatar jumys júrgizilip jatyr. máselen, aýyldyq jerlerdiń ınfraqurylymyn jańǵyrtý maqsatynda «Aýyl — el besigi» jobasy aıasynda 2022–2024 jyldary respýblıkalyq bıýdjetten Abaı oblysyna 18,8 mlrd teńge qarajat bólinip, 221 joba, al Ulytaý oblysyna 6 mlrd teńge bólinip, 37 joba iske asyryldy.
— Sonymen qatar joba aıasynda 2025 jyly Abaı oblysyna 8,6 mlrd teńge, al Ulytaý oblysyna 5,2 mlrd teńge qarajat qarastyrylǵan. Sondaı-aq, jalpy sıpattaǵy transfertterdi qalyptastyrý kezinde júıe kórsetkishterin qamtamasyz etýde eń úlken alshaqtyq bar eldi mekenderge basty nazar aýdarylady. Olar jobalardy qarjylandyrý kezinde basymdylyqqa ıe bolady, — dedi mınıstrlikten.
Aıta keteıik, Qazaqstan Respýblıkasynyń 2025-2030 jyldarǵa arnalǵan óńirlik damý tujyrymdamasy ázirlenip, múddeli memlekettik organdarmen kelisilip jatyr.