Óńirlik standarttar júıesi: Osal eldi mekenderge basa nazar aýdarylady
ASTANA. KAZINFORM – Qanat Bozymbaev jańa Bıýdjet kodeksi aıasynda Óńirlik standarttar júıesin túsindirý boıynsha mınıstrliktermen, oblystyq jáne qalalyq ákimdiktermen keńes ótkizdi.
Óńirlik standarttar júıesi (ÓSJ) – respýblıkalyq mańyzy bar qalalardan bastap aýyldarǵa deıingi eldi meken turǵyndaryna áleýmettik jáne ınjenerlik-kólik ınfraqurylymy nysandary men qyzmetterimen qamtamasyz etilýi tıis negizgi tizim.
Halyqtyń ómir súrý sapasyn teńestirý maqsatynda úsh jyldyq kezeńge arnalǵan jalpy sıpattaǵy transfertterdi qalyptastyrý kezinde ÓSJ-niń 12 baǵyty boıynsha qamtamasyz etilý deńgeıi eskeriledi: bilim berý, densaýlyq saqtaý, áleýmettik qamsyzdandyrý, ınjenerlik ınfraqurylym, kólik ınfraqurylymy, jol ınfraqurylymy, mádenıet jáne sport, qaýipsizdik pen qorshaǵan ortany qorǵaý, aqparattyq-kommýnıkatsııalyq júıe, turmystyq qyzmet kórsetý ınfraqurylymy, qyzmetter ınfraqurylymy, bos ýaqyt pen demalys.
Osylaısha, ÓSJ óńirler arasyndaǵy jáne óńir ishindegi ınfraqurylymǵa qoljetimdilik teńsizdigin azaıtýǵa, eldi mekenderdiń damýyn tıimdi josparlaýǵa jáne bıýdjet qarajatyn ádil bólýge múmkindik beredi.
– Negizgi nazar ÓSJ kórsetkishteri boıynsha qamtamasyz etilý deńgeıi eń tómen eldi mekenderge aýdarylady. Bul jobalar birinshi kezekte qarjylandyrylady. ıAǵnı jaǵdaıy nashar óńirlerge kóbirek qarjy bólinedi, al jaǵdaıy jaqsy óńirlerge azyraq. Muny barlyq óńir jaqsy túsinýi kerek, – dedi óńirlik damý máselelerin qadaǵalaıtyn Qanat Bozymbaev.
Eldi mekenderdiń ınfraqurylymmen qamtamasyz etilýi boıynsha eń joǵary kórsetkish Almaty qalasynda (90,9%), al eń tómen kórsetkish Abaı (58,1%) jáne Ulytaý (55,3%) oblystarynda tirkeldi. Monıtorıng nátıjesi boıynsha bul eki óńirde bazalyq ınfraqurylymmen qamtamasyz etilý deńgeıi tómen. Osyǵan baılanysty Qanat Bozymbaev Ulytaý jáne Abaı oblystarynyń ákimdikterine ÓSJ aıasynda alshaqtyqtardy qysqartý boıynsha sharalar qabyldaýdy tapsyrdy.
Sondaı-aq Vıtse-premer salalyq memlekettik organdarǵa, sondaı-aq Astana, Almaty, Shymkent qalalary men oblystardyń ákimdikterine Óńirlik standarttar júıesin jergilikti deńgeıde engizýge baılanysty barlyq bıýrokratııalyq úderisti jedeldetýdi tapsyrdy.
Aıta keteıik, Qanat Bozymbaev «Energetıka jáne kommýnaldyq sektorlardy jańǵyrtý» Ulttyq jobasyn júzege asyrý barysyn tekserdi.