Óńirlik sport basqarmasy basshylary mınıstrlik komıssııasynyń sheshimimen taǵaıyndalady
ASTANA. KAZINFORM – Óńirlik sport basqarmalary basshylary QR Týrızm jáne sport mınıstrligi janynan qurylǵan komıssııanyń kelisimimen taǵaıyndalatyn bolady.
Mınıstrliktiń baspasóz qyzmetinen málim etkenindeı, Qazaqstan Respýblıkasy Prezıdenti Qasym-Jomart Toqaevtyń tapsyrmasyna sáıkes óńirlik sport basqarmalarynyń basshylaryn taǵaıyndaý tártibi ózgerdi.
Budan bylaı basqarma basshylyǵyna usynylǵan úmitkerler QR Týrızm jáne sport mınıstrliginiń janynan qurylǵan komıssııanyń kelisimin alýy kerek. Komıssııa jumysyna mınıstr Erbol Myrzabosynov jetekshilik etedi.
«Prezıdent Qasym-Jomart Toqaev HHHІІІ jazǵy Olımpıada júldegerlerimen kezdesýinde árbir óńir qandaı sport túrin damytý kerektigine qatysty sheshimdi derbes qabyldaıtynyn synǵa alǵan bolatyn. Osyǵan oraı Memleket basshysy sport salasyndaǵy barlyq deńgeıdegi basqarý vertıkalin qalpyna keltirý jóninde Úkimetke naqty tapsyrma berdi. Komıssııanyń jumysy barysynda óńirlik sport basqarmalary basshylyǵyna usynylǵan kandıdattar naqty talaptar boıynsha baǵalanady. Úmitkerlerdiń saladaǵy tájirıbesi men damytý jospary bolýy, sondaı-aq sport ǵylymynyń negizi men menedjmentin meńgergeni eskeriledi. Kandıdattardy usynýdy jergilikti atqarýshy organdar jáne mınıstrlik júzege asyra alady. Jergilikti atqarýshy organ komıssııanyń oń qorytyndysyn alǵan kandıdattardy ǵana taǵaıyndaıdy», dep habarlady vedomstvodan.
Aıta keteıik, qazirgi kezde BQO dene shynyqtyrý jáne sport basqarmasy basshysynyń orny bos tur.
