Óńirlik saıasat jobalyq keńsesiniń birinshi otyrysy vıtse-premer Qanat Bozymbaevtyń tóraǵalyǵymen ótti
ASTANA. KAZINFORM - Óńirlik saıasatty jetildirý jáne óńirlerdiń teńgerimdi áleýmettik jáne ekonomıkalyq damýyn qamtamasyz etý maqsatynda vıtse-premer Qanat Bozymbaevtyń tóraǵalyǵymen jobalyq keńse quryldy.
Onyń quramyna barlyq ortalyq memlekettik organdar, ákimdikter, Parlament depýtattary jáne sarapshylar kirdi.
Birinshi otyrys barysynda jobalyq keńse músheleri óńirlerdiń áleýetin ashýǵa erekshe nazar aýdara otyryp, óńirlik damýdyń jańa tásilderin iske asyrý jónindegi sharalardy talqylady.
«Óńirlerdiń áleýetin tolyq paıdalaný qajet, bul rette eń úlken ınfraqurylymdyq problemalary bar óńirlerdi qarjylandyrýǵa baǵyttalýy tıis. Óńirlerge jobalardy qarjylandyrýda, onyń ishinde túpkilikti nátıjege qol jetkizýge baǵyttalǵandyǵyn eskere otyryp, barynsha derbestik berý qajet. Sondaı-aq salyq túsimderin asyra oryndaǵany úshin óńirlerdi kótermeleý qajet», — dedi Qanat Bozymbaev.
Sonymen qatar otyrysqa qatysýshylar óńirlerdiń damýyndaǵy dısproportsııalardy boldyrmaý, jańa strategııalyq qujattardy ázirleý, sondaı-aq jergilikti jerlerde sheshim qabyldaýda aýdan jáne aýyl ákimderiniń derbestiginiń jetkiliksizdigi máseleleri boıynsha sharalardy talqylady. Jergilikti ózin-ózi basqarýdy damytý úshin Amanat partııasynyń depýtattary memlekettik qyzmet isteri agenttigimen birlesip «Ákimder mektebi» jobasyn iske qosýdy usyndy.
«Jobalar iske asyrylatyn aýyldardy tıimdi iske asyrý jáne sapaly irikteý úshin oblys ákimdikteri jergilikti ózin-ózi basqarýdy damytý jónindegi kishi toppen birlesip, qajetti ınfraqurylym salý jáne ónimdi ótkizýge kómek kórsetý jónindegi naqty josparlardy ázirleı otyryp, árbir aýyldyń mamandanýyn aıqyndaı otyryp, skrınıng júrgizýi qajet», — dep tapsyrdy Qanat Bozymbaev.
Vıtse-premer jergilikti ózin-ózi basqarý salasyndaǵy zańnamany jetildirý boıynsha tapsyrmalar berdi.
«Memlekettik organdar arasynda salaaralyq úılestirý álsiz. Bul tájirıbeni joıý kerek. Óńirlik jáne salalyq saıasatty kelisilgen iske asyrýdy júrgizý qajet. Bıýdjettik baǵdarlamalar men ınvestıtsııalyq josparlardy oryndaý sınhrondy túrde júzege asyrylýy tıis», — dep atap ótti Qanat Bozymbaev.
Memlekettik organdarǵa bir aı merzimde óńirlik saıasatty jetildirýdiń ázirlengen sharalaryn iske asyrýdyń barlyq usynylǵan sharalary boıynsha vedomstvolyq normatıvtik quqyqtyq aktilerge tekserý júrgizý tapsyryldy.
Aıta keteıik, buǵan deıin Jobalyq keńse otyrysynda Alataý qalasyn damytý máselesi talqylandy.