Óńirlik rámizderdi ázirleý jáne paıdalaný erejeleri bekitildi
ASTANA. KAZINFORM — 2026 jylǵy 8 shildede Mádenıet jáne aqparat mınıstri mindetin atqarýshynyń buıryǵymen óńirlik rámizderdiń jobasyn ázirleý qaǵıdalaryna ózgerister engizildi.
Qujatqa sáıkes, óńirlik rámizderdiń jobasyn ázirleý barysynda birqatar qaǵıdatty negizgi alý mindetti. Olar — qoǵamdyq kelisim men jalpyulttyq birlikti nyǵaıtý; geraldıkalyq talaptardy saqtaý; óńirdiń ulttyq dástúrlerin, tarıhı, mádenı, tabıǵı, geografııalyq jáne áleýmettik-ekonomıkalyq erekshelikterin eskerý.
Sonymen qatar, jobany daıyndaý kezinde QR Memlekettik Týy men Memlekettik Eltańbasynyń beınesin, sondaı-aq dinı, rýlyq jáne taıpalyq belgilerdi paıdalanýǵa tyıym salynady.
Jobany ázirleý barysynda eskerilýi tıis basqa da talaptar bar. Olar — joba buryn paıdalanylmaǵan, óńirdiń bolashaq damý baǵytyn aıqyndaıtyn jańa týyndy bolýy kerek; joba aıqyn bederi bar kólemdi beıne nemese maket túrinde usynylady; jobadaǵy resmı ataýlar, jazýlar jáne ózge de mátinder qazaq tilinde jazylady; jobany ázirleý kezinde avtorlyq quqyqtardy buzýǵa, plagıatqa jol berilmeıdi.
Jobany tek QR azamattary daıyndaı alady. Eger jobany birneshe jeke tulǵa birlesip ázirlese, olardyń barlyǵy onyń avtorlary (teń avtorlary) bolyp esepteledi.
Jobany ázirleý kezinde ulttyq-etnografııalyq elementterdi (oıý-órnekterdi) paıdalanýǵa ruqsat etiledi.
Jobany ázirleýge arnalǵan konkýrs mynadaı kezeńderden turady:
• elorda, oblys jáne respýblıkalyq mańyzy bar qala ákimdiginiń konkýrsqa qatysýǵa ótinim qabyldaýdyń bastalǵany týraly habarlandyrý jarııalaýy;
• konkýrsqa qatysý úshin ótinimderdi qabyldaý;
• jergilikti atqarýshy organnyń jobalardy qaǵıdalardyń 6-tarmaǵy talaptaryna sáıkestigi turǵysynan qaraýy;
• elorda, oblys jáne respýblıkalyq mańyzy bar qala turǵyndary arasynda jobalar boıynsha qoǵamdyq talqylaý ótkizý;
• jobalardy Saraptamalyq keńestiń qaraýy;
• jobany máslıhattyń bekitýi.
Konkýrsqa qatysýǵa ótinim qabyldaý týraly habarlandyrý jergilikti atqarýshy organnyń ınternet-resýrsynda konkýrs aıaqtalǵanǵa deıin keminde úsh aı buryn jarııalanady.
Konkýrsqa qatysý týraly ótinim qazaq jáne orys tilderinde qabyldanady jáne onda jobanyń sıpattamasy kórsetiledi.
Jergilikti atqarýshy organdar ótinimderdi qabyldaý merzimi aıaqtalǵan kúnnen bastap 15 jumys kúni ishinde qaraıdy.
Konkýrsqa usynylǵan jobalar ulttyq qundylyqtar men dástúrlerdi, respýblıkanyń mádenı, týrıstik, tarıhı, geografııalyq, saıası jáne áleýmettik-ekonomıkalyq erekshelikterin eskere otyryp irikteledi.
Eger joba belgilengen talaptarǵa sáıkes kelmese, jergilikti atqarýshy organ ótinimdi qabyldaýdan bas tartý týraly sheshim shyǵarady.
Ótinish berýshige ótinimdi qabyldaýdan bas tartý týraly aldyn ala sheshimniń kóshirmesi qosa berilgen habarlama oǵan qol qoıylǵanǵa deıin keminde bes jumys kúni buryn jiberiledi.
Ótinish berýshi mundaı aldyn ala sheshimge qarsylyǵyn habarlamany alǵan kúnnen bastap eki jumys kúni ishinde usyna alady.
Ótinimdi qaraý merzimi aıaqtalǵannan keıin bir aı ishinde jergilikti atqarýshy organ jobalar boıynsha qoǵamdyq talqylaý ótkizedi.
Qoǵamdyq talqylaýdyń qorytyndylary hattamamen rásimdeledi.
Qoǵamdyq talqylaýda eń kóp daýys jınaǵan jobalar talqylaý aıaqtalǵan kúnnen bastap 25 jumys kúni ishinde Saraptamalyq keńestiń otyrysynda qaralady.
Saraptamalyq keńestiń qorytyndysy hattamamen rásimdeledi.
Oń qorytyndy alǵan jobalar 15 jumys kúni ishinde tıisti máslıhattyń sheshimimen bekitiledi.
Óńirlik rámizderdi mynadaı jaǵdaılarda paıdalanýǵa ruqsat etiledi:
• jergilikti deńgeıdegi mádenı, buqaralyq, sporttyq, bilim berý jáne dinı is-sharalarda;
• taýar belgilerinde, úkimettik emes uıymdardyń, qoǵamdyq birlestikterdiń, jeke mekemeler men kásipkerlik sýbektileriniń emblemalarynda (rámizderinde), sondaı-aq arnaıy jáne sporttyq kıimderde;
• mereıtoılyq medaldarda, alǵys hattarda, quttyqtaý jáne kádesyı ónimderinde, sondaı-aq elorda, oblys jáne respýblıkalyq mańyzy bar qalalardyń qurmetti azamattaryna tabystalatyn marapattarda.
Aıta keteıik, buǵan deıin memlekettik rámizderdi paıdalaný qaǵıdalary jańartylǵanyn jazǵanbyz.
