Óńirlik kvotaǵa engizilmegen hırýrg sotta jeńdi: Mansap ortalyǵy kináli dep tanyldy
ASTANA. KAZINFORM — Pavlodarda qonys aýdarýshy hırýrgtiń quqyǵy buzylǵany anyqtaldy. Sot Mansap ortalyǵyn ony kvotaǵa qosýdy mindettedi, dep habarlaıdy oblystyq sottyń baspasóz qyzmeti.
2024 jyldyń qyrkúıeginde ońtústik óńirden Pavlodarǵa qonys aýdarǵan hırýrg qaladaǵy emdeý mekemeleriniń birine jumysqa ornalasqannan keıin, qonys aýdarýshylarǵa arnalǵan óńirlik kvotaǵa qosylyp, materıaldyq qoldaý alýǵa nıettengen. Ol Mansap ortalyǵyna júgingen kezde, qyzmetkerler kvotaǵa engizý úshin qosymsha qujattar, onyń ishinde Pavlodar qalasynda turǵylyqty jeri boıynsha tirkeýdi talap etken.
Alaıda 2024 jyldyń jeltoqsanynda ortalyq aǵymdaǵy jylǵa kvota bólýdiń aıaqtalǵanyn aıtyp, onyń qujattaryn qabyldaýdan bas tartty. 2025 jyldyń qańtar, aqpan jáne naýryz aılarynda ótinish ıesi qaıtadan júgingenimen, bul joly kóshi-qon veb-portalyna elektrondy formatqa kóshý sebep bolyp, ótinish taǵy qabyldanbaǵan. Júıe Pavlodar oblysynda tirkelgen azamattardyń ótinishterin tehnıkalyq turǵyda qabyldamaǵan.
Birneshe ret eskerýsiz qalǵannan keıin azamat sotqa júginýge májbúr boldy.
Sot Mansap ortalyǵynyń áreketin zańsyz dep tanydy. Sheshimde ortalyq kvota berý tártibin retteıtin Ereje normalaryn durys túsindirmegeni, al jergilikti tirkeýdi talap etý — zańǵa qaıshy ekeni kórsetildi. Sonymen qatar tehnıkalyq aqaý nemese zańda qarastyrylmaǵan qujattardy talap etý jeńildikterden bas tartýǵa negiz bola almaıtyny atap ótildi.
— Sot hırýrgtiń Pavlodar oblysynda turaqty turýdy tańdaǵanyn jáne aımaqta áleýmettik mańyzy bar medıtsınalyq qyzmet kórsetetinin eskerip, Mansap ortalyǵyna ony 2024 jyldyń qazan aıynan bastap óńirlik kvotaǵa engizýdi mindettedi. Osy kúnnen bastap onyń materıaldyq kómek alýǵa quqyǵy bar ekeni moıyndaldy. Sonymen birge sot ýákiletti organǵa talap qoıýshynyń quqyǵyn buzǵan laýazymdy tulǵalarǵa qatysty shara qoldaný týraly jeke uıǵarym shyǵardy. Nátıjesinde Mansap ortalyǵynyń dırektory tártiptik jazaǵa tartyldy. Sot sheshimi zańdy kúshine endi, — delingen habarlamada.
Budan buryn bıyl 5 myńnan astam adam óz erkimen qonys aýdarý múmkindigin paıdalanǵany habarlandy.