Óńirlik klýbtardan álemdik arenaǵa deıin: elimizde fýll-kontakt karate qalaı damyp keledi
ASTANA.KAZINFORM – Qazaqstanda fýll-kontakt karateni damytyp júrgen uıymdardyń ózara baılanysyn bir júıege keltirý jumystary qolǵa alyndy. Bul birlestik jarystardy ótkizý erejelerin úılestirýge, sportshylardy irikteý tártibin ashyq ári túsinikti etýge, sondaı-aq klýbtar men óńirlik qurylymdar arasyndaǵy yntymaqtastyqty nyǵaıtýǵa baǵyttalǵan.
2026 jyly Qazaqstan Respýblıkasynyń Ulttyq Olımpıada komıteti Qazaqstannyń Ulttyq fýll-kontakt karate qaýymdastyǵyn osy sport túri boıynsha ulttyq federatsııa retinde resmı tanydy. Qaýymdastyq Dúnıejúzilik fýll-kontakt karate uıymynyń (WFKO) qamqorlyǵymen damyp kele jatqan, olımpıadalyq baǵdarlamaǵa kirmeıtin Full contact karate sport túri boıynsha ulttyq federatsııa mártebesin aldy.
Qaýymdastyq ókilderiniń aıtýynsha, uıymnyń basty strategııalyq maqsaty qazaqstandyq sportshylardyń Azııa oıyndary men Olımpıada oıyndaryna qatysýyna jol ashý. Osy maqsatqa jetý úshin el ishinde fýll-kontakt karateniń damýyna qoldaý kórsetip, onyń halyqaralyq deńgeıdegi bedelin arttyrý kózdelip otyr.
Baǵytty damytýdyń kelesi kezeńinde óńirlik jelini nyǵaıtý, ortaq jumys tártibin qalyptastyrý jáne qyzmetti qoldanystaǵy zańnama talaptaryna sáıkestendirý máselelerine basymdyq berilmek.
Aıta keteıik, sport salasyndaǵy zańnamalyq ózgeristerge sáıkes, 2025 jylǵy 16 maýsymnan bastap «bir sport túri – bir akkredıtteý» qaǵıdaty engizildi. Oǵan saı, ár sport túri boıynsha bir ulttyq federatsııa akkredıttelip, jergilikti federatsııalar onyń quramyna kirýge tıis.
Osyǵan baılanysty Qazaqstannyń Ulttyq fýll-kontakt karate qaýymdastyǵynyń prezıdenti Bolat Baqtaev uıymdardy biriktirý kezinde olardyń teń quqyly qatysýy men ár mekteptiń qalyptasqan dástúrine qurmetpen qaraý basty nazarda bolýy kerek ekenin aıtty.
– Birigý – ortaq erejeler jóninde kelisip, ár mekteptiń tarıhy men dástúrin qurmetteı otyryp, bir maqsatqa qaraı qadam basýǵa múmkindik beretin jol. Bul bir uıymnyń ekinshisin ózine qosyp alýyn bildirmeýi kerek. Sheshimder alqaly túrde qabyldanyp, júıe ashyq ári júıeli jumys istegeni mańyzdy, – dedi ol.
Ortaq tásilderdi engizý sportshylarǵa jarystar kúntizbesin jaqsy túsinýge jáne irikteý talaptaryn naqty bilýge múmkindik beredi dep kútilip otyr. Al jattyqtyrýshylar men klýbtar ortaq talaptardy talqylaýǵa qatysyp, osy sport baǵytynyń múddesin birlese qorǵaýǵa múmkindik alady. Sonymen qatar ár mekteptiń ózindik daıyndyq erekshelikteri men qalyptasqan dástúrlerin saqtaý kózdelip otyr.
Oǵan qosa, uıymdardy biriktirý úderisi halyqaralyq deńgeıde de júrip jatyr. Dúnıejúzilik fýll-kontakt karate uıymy – WFKO 2019 jyly qurylǵan. Uıymnyń negizgi maqsattarynyń qatarynda ártúrli stılder men sporttyq qurylymdardy biriktirý, ortaq jarystar ótkizý jáne fýll-kontakt karateniń olımpıadalyq sport túri retinde tanylýyna yqpal etý bar.
2025 jyly WFKO aıasynda ártúrli mektepterdiń ókilderi qatysqan alǵashqy álem chempıonaty ótti. Qazaqstannyń Ulttyq fýll-kontakt karate qaýymdastyǵynyń málimetinshe, bul baǵyttyń aldaǵy damýy uıymdardyń óńirlerdiń ókildigin qamtamasyz etý, ókilettikterdi bólý jáne sheshim qabyldaý tetikteri jóninde ortaq kelisimge kele alýyna baılanysty bolady.
Dál osy máselelerdiń qalaı sheshiletini ortaq qaǵıdattardyń is júzinde qanshalyqty tıimdi júzege asatynyn aıqyndaıdy. Onyń nátıjesi sport klýbtarynyń, jattyqtyrýshylardyń jáne tıisti uıymdardyń kúndelikti jumysynan kórinis tabady.
Aıta keteıik, qazaqstandyq úsh karateshi álemdik reıtıngide kósh bastaǵan edi.
