Óńirlik kadr rezervi: Jambyl oblysynyń ákimi úmitkerlerdi tyńdady
TARAZ. KAZINFORM – Jambyl oblysynda Óńirlik kadr rezervi jobasynyń «Qurylymdyq suhbat» kezeńi ótti. Bul týraly Jambyl oblysy ákiminiń baspasóz qyzmeti habarlady.
Jambyl oblysynyń ákimi Erbol Qarashókeevtiń tóraǵalyǵymen Óńirlik kadr rezerviniń «Qurylymdyq suhbat» kezeńiniń komıssııa otyrysy ótti. Joba aıasynda úmitkerler tańdaǵan salalyq baǵyttaryna sáıkes jobalaryn qorǵap, komıssııa músheleriniń saýaldaryna jaýap berdi.
Komıssııa quramynda máslıhat tóraǵasy, QR Memlekettik qyzmet isteri agenttigi departamentiniń ókilderi, basqarma basshylary, úkimettik emes uıymdardyń, bıznes-qoǵamdastyqtardyń ókilderi boldy, sondaı-aq sarapshylar tartyldy.
Óńirlik kadr rezervi — jas basshylar pýlyn qalyptastyrýdy kózdeıdi. Osy maqsatta aǵymdaǵy jyldyń 1 naýryzynan bastap úmitkerlerdiń qujattary qabyldandy.
«Birneshe kezeńnen turatyn irikteý QR Memlekettik qyzmet isteri agenttiginiń óńirlik departamentimen birlesip júrgizildi. Jalpy Óńirlik kadr rezervine 478 jambyldyq ótinish bergen, onyń 39-y jobanyń sońǵy „Qurylymdyq suhbat“ kezeńine joldama aldy», — delingen habarlamada.
Úmitkerlerdiń 14-i áleýmettik, 10-y ındýstrııa jáne ónerkásip, 7-i ekonomıka jáne qarjy, 3-i tsıfrlandyrý, 2-i agroónerkásiptik keshen jáne jer qatynastary, 2-i turǵyn úı-kommýnaldyq sharýashylyq jáne ınfraqurylym, 1-i ekologııa salasyn tańdaǵan.
Komıssııa otyrysynda kandıdattar óńirdiń áleýmettik-ekonomıkalyq damýyna negizdelgen jobalaryn qorǵady. Atap aıtqanda, olar ınvestıtsııalyq áleýetti arttyrý, densaýlyq saqtaý salasyn jańǵyrtý, aýyl sharýashylyǵyn túletý tetikteri men ózge de baǵyttardy usyndy. Budan bólek, jasandy ıntellektini óndiriske engizý, NEET sanatyndaǵy jastardyń sanyn azaıtý, azyq-túlik qaýipsizdigine qatysty bastamalaryn kóterip, oılaryn ortaǵa saldy.
— Óńirlik kadr rezervine alynǵan jalyndy jastar ózgeristerdiń qozǵaýshy kúshi, myqty tiregine aınalyp, memleketemizdiń ósip-órkendeýine úles qosady degen senimdemiz, — dedi Jambyl oblysynyń ákimi Erbol Qarashókeev.
Aıta keteıik, Óńirlik kadr rezervine 25 kandıdat joldama alady. Olar saılanatyn laýazymdardy qospaǵanda, jergilikti atqarýshy organdardaǵy «B» korpýsynyń memlekettik ákimshilik laýazymdaryna jumysqa ornalasatyn bolady.
