Óńirlik ınvestıtsııalyq shtabtardyń jumysynda olqylyqtar bar – Úkimet basshysy
ASTANA. KAZINFORM — Búgin Úkimet otyrysynda Premer-mınıstr Oljas Bektenov iri ken oryndarynyń turaqty jumysyn qamtamasyz etýdi tapsyrdy.
- Munaı-gaz salasy ekonomıkanyń ósýine úlken úles qosyp keledi. Munaı óndirisinde oń dınamıka qalyptasyp otyr. Energetıka mınıstrligine óndiris qarqynyn tómendetpeı, operatorlarmen birlesip, Teńiz, Qashaǵan jáne Qarashyǵanaq iri ken oryndarynyń turaqty jumysyn qamtamasyz etýdi tapsyramyn. Gaz salasynda da ósim bar. Energetıka mınıstrligi Qarashyǵanaq jáne Qashaǵan ken oryndarynda úsh gaz óńdeý zaýytyn salý jobalaryn jeke baqylaýda ustaýy qajet, - dedi Úkimet basshysy.
Premer-mınıstr 9 aıdyń qorytyndysy boıynsha ınvestıtsııa tartý jospary 93,3 paıyzǵa oryndalǵanyn aıtty.
- 20 óńirdiń ishinde tek 11 óńir ǵana nysanaly kórsetkishke qol jetkizdi. Investıtsııalardy qoldaýdyń qolda bar tetikterine qaramastan 9 óńir josparly kórsetkishterdi oryndaı almady. Bul jaǵdaı ákimder tóraǵalyq etetin Óńirlik ınvestıtsııalyq shtabtardyń jumysynda olqylyqtardyń baryn kórsetedi. Ár jobaǵa basynan aıaǵyna deıin jeke qoldaý kórsetý jáne olardyń ýaqtyly iske asyrylýyn qamtamasyz etý – asa mańyzdy mindet. Syrtqy ister mınıstrligine, salalyq mınıstrlikter men ákimdikterge ınvestıtsııalyq jobalardy tartý jáne qoldaý jumysyn kúsheıtýdi tapsyramyn, - dedi Oljas Bektenov.
Aıta keteıik, Úkimet otyrysynda 2025 jylǵy qańtar-qyrkúıek aılaryndaǵy áleýmettik-ekonomıkalyq damý qorytyndylary men respýblıkalyq bıýdjettiń atqarylý barysy talqyǵa salyndy.