Óńirlik ekologııalyq sammıtte sý únemdeý tehnologııalary talqylanady
ASTANA. KAZINFORM — 22-24 sáýir aralyǵynda Astanada alǵashqy Óńirlik ekologııalyq sammıt ótedi. Basqosýdyń maqsat-mindetin Halyqaralyq jasyl tehnologııalar jáne ınvestıtsııalyq jobalar ortalyǵynyń bıýro basshysy Qaırat Másenov Jibek Joly telearnasynyń «Búgin Live» baǵdarlamasynda tarqatty.
— Bastamany Prezıdent Qasym-Jomart Toqaev 2023 jyldyń qyrkúıeginde BUU Bas Assambleıasynyń 78-shi sessııasy barysynda kótergen edi. Jıynda Ortalyq Azııa memleketteri basshylarynyń ekologııa jáne ornyqty damý salasyndaǵy óńirlik yntymaqtastyq jónindegi birlesken deklaratsııasy qabyldanady dep kútilip otyr Sondaı-aq ózara is-qımyldy keńeıtý maqsatynda memorandýmdarǵa qol qoıylmaq. Odan bólek, sammıt aıasynda halyqaralyq jasyl jáne turaqty tehnologııalar kórmesi de uıymdastyrylady, — dedi Qaırat Másenov.
Sammıt tek talqylaý alańy emes, naqty sheshimder usynylatyn praktıkalyq formatqa baǵyttalyp otyr, ıaǵnı, teorııalyq tujyrymdamalardan góri iske asyrylatyn jobalar men tehnologııalarǵa basymdyq beriledi.
— Oǵan memleket, bıznes, ǵylymı qaýymdastyq ókilderi qatysady. Sammıt Ortalyq Azııa óńirindegi turaqty damýdyń biregeı ekologııalyq júıesine aınalady desek bolady, — dedi bıýro basshysy.
Kún tártibindegi negizgi baǵyttardyń biri — sý resýrstary máselesi. Óńirdegi ekologııalyq ahýal bul taqyryptyń ózektiligin aıqyn kórsetedi.
— Ortalyq Azııanyń 20 paıyzy, 80 mln ga shóleıttenýge aınalǵan, sý tapshylyǵy qatty sezilip otyr. Sharaǵa Shveıtsarııadan — sý únemdeý, Sıngapýrdan — jańbyr sýyn paıdalaný tájirıbesin bólisý úshin halyqaralyq mamandar keledi. Olarda «aqyldy sýarý» tehnologııalary jetkilikti, — dedi spıker.
Sonymen qatar, sammıt aıasynda ınnovatsııalyq jobalar men jastardyń startap bastamalaryna da erekshe nazar aýdarylady. Sharaǵa 20 myńǵa jýyq qatysýshy keledi dep josparlanyp otyr.
Buǵan deıin Májilis depýtaty Marhabat Jaıymbetov onlaın saýdanyń damýy ekologııaǵa zııan keltirip jatqanyn aıtqan edi.
