Óńirlik ekologııalyq sammıtte metan shyǵaryndylaryn azaıtý máselesi kóterildi
ASTANA. KAZINFORM – Aýadaǵy metan kólemi azaısa, kúlli ekojúıege oń áserin tıgizedi. Bul jóninde BUU Bas hatshysynyń orynbasary jáne BUU-nyń Qorshaǵan orta boıynsha baǵdarlamasynyń atqarýshy dırektory Inger Andersen Óńirlik ekologııalyq sammıtte málimdedi.
– Orta Azııa birqatar ózekti ekologııalyq máselemen betpe-bet kelip otyr. Temperatýranyń álemdik normadan eki ese jyldam jylynýy, flora men faýna sanynyń azaıýy, taýlardaǵy ekojúıeniń buzylýy, aýa men topyraqtyń lastanýy – osynyń bári kóz aldymyzda bolyp jatyr. Osyndaı jaıttar Aral teńiziniń qurǵaýyna alyp keldi. Kaspııdiń de deńgeıi tómendep barady. Muzdyqtar erip, sý qory azaıyp, aýyl sharýashylyǵyna, azyq-túlik qaýipsizdigine qater tónip otyr, – dedi ol.
Degenmen mamannyń aıtýynsha, Orta Azııa elderi qol qýsyryp qarap otyrmaı, áreket etip jatyr. Sonyń bir kórinisi – Astanada uıymdastyrylǵan Óńirlik ekologııalyq sammıt jáne t.b. konventsııalar men bastamalar. Sonymen qatar ol Qazaqstannyń ótken aıda jańa Konstıtýtsııaǵa ekologııany qorǵaý týraly normany engizgenin aıryqsha atap ótti.
BUU Bas hatshysynyń orynbasary osyndaı jobalardy iske asyryp jatqan elimizge jáne Orta Azııanyń ózge de memleketterine alǵys aıtty. Budan bólek, aýa lastanýynyń deńgeıin tómendetý úshin birqatar usynysyn málimdedi.
– Munaı jáne gaz óndirisindegi metan gazynyń shyǵaryndylaryn azaıtý máselesin kótergim keledi. Bul jahandyq jylyný deńgeıin kúrt túsirýge áser eter edi. Orta Azııadaǵy barlyq el Metan shyǵaryndylaryn azaıtý boıynsha jahandyq mindettemege qosyldy. Ol úshin barshańyzǵa rahmet aıtamyn. Atalǵan mindettemege saı, metan shyǵaryndylaryn 2030 jylǵa deıin 30%-ǵa azaıtý josparda bar. Barlyq memleketti osy bastamaǵa atsalysýǵa shaqyramyn, – dedi ol.
Sonymen birge, Inger Andersenniń sózinshe, metan shyǵaryndylary qysqarsa, sý tapshylyǵy, shóleıttený, janýarlarǵa tónetin qaýip sekildi máseleler de sheshiledi.
Aıta keteıik, buǵan deıin Qyrǵyzstan Qazaqstanmen jáne ózge kórshilerimen ekologııalyq qaýipsizdikti qamtamasyz etýge daıyn ekenin jazǵanbyz.
