Óńirlik ekologııalyq sammıtte Kaspıı teńizi máselesi kóterildi
ASTANA. KAZINFORM – Sý deńgeıi jylyna 7-10 santımetrge tómendep barady. Bul jóninde Ekonomıkalyq yntymaqtastyq uıymynyń (EYU) bas hatshysy Asad Madjıd Han Óńirlik ekologııalyq sammıtte málimdedi
– Kaspıı teńizi – ekologııalyq qazyna ǵana emes, saýda-sattyq, energııa jáne jalpy ómir súrýge qajetti resýrstar úshin aýadaı qajet kúretamyr, – dedi ol.
Mamannyń sózinshe, osyndaı mańyzdy sý aıdyny tartylyp bara jatyr.
– 1990 jyldardyń ortasynan bastap, sý deńgeıi eki metrge túsken. Jer serikteri arqyly jınalǵan derekterge súıensek, sońǵy ondaǵan jylda jylyna 7-10 santımetrden tómendep otyrǵan. Qazaqstannyń ózinde cońǵy 20 jylda jaǵalaý 30-35 shaqyrymǵa shegingen. Osyndaı faktiler máseleniń ýshyǵyp turǵanyn kórsetedi, – dedi ol.
Sonymen qatar máseleni sheshý jolyn usyndy.
– Jýyrda júrgizilgen zertteýler teńiz tabanyn durys jolmen tereńdetý port ınfraqurylymynyń sapasyn jaqsartatynyn kórsetti. Azııa ınfraqurylymdyq ınvestıtsııalar banki men Ekonomıkalyq yntymaqtastyq uıymynyń Saýda jáne damý bankin jáne basqa da seriktesterdi osy jumystardy keńeıtý úshin qoldaý bildirýge shaqyramyz, – dedi Asad Madjıd Han.
Aıta keteıik, buǵan deıin BUU jasyl energetıka men tsıfrlandyrýǵa kóshýdi jedeldetýge shaqyrǵanyn jazǵanbyz.
